tere hijr ne ata ki ye ajib be-qarari

tire hijr ne atā kī ye ajiib be-qarārī

na sakat hai zabt-e-ġham kī na majāl-e-ashk-bārī

mire somnāt-e-dil par saf-e-ġhaznavī se baḌh kar

tirī shabnamī adā.eñ tirā tarz-e-ġham-gusārī

maiñ kahāñ huuñ aur kyā huuñ tū kahāñ hai aur kyā hai

isī justujū meñ guzrī kabhī raat saarī saarī

ye satīza-gāh-e-ālam ye harīf-e-zulf-e-barham

na junūn-e-fitna-sāmāñ na ḳhirad kī hoshiyārī

tū mirī nazar meñ kāfir maiñ tirī nazar meñ kāfir

maiñ asīr-e-zulf-e-jānāñ tū harīs-e-shahryārī

mirī ḳhushk kisht-e-dil par tire lafz barq-e-muztar

ki dhuāñ dhadhak na jaa.e tirī tohmatoñ pe vaarī

ye mujāvirān-e-kā'ba inheñ kyā huā ḳhudāyā

tire dostoñ se nafrat tire dushmanoñ se yaarī

koī rustamī se kah de koī marhabī se kah de

maiñ ġhulām-e-mustafā huuñ mirā shauq jāñ-nisārī

hai bayān-e-hāl-e-gulshan ye jale jale nasheman

ye ghuTī-ghuTī fazā.eñ ye guloñ kī āh-o-zārī

ai ġhurūr-e-banda-parvar tujhe ho jo ḳhauf-e-mahshar

to sarīr-e-saltanat bhī hai kulāh-e-ḳhārdārī

rah-e-zindagī meñ 'bazmī' ye matā-e-dil kī baazī

kabhī rahzanoñ se haarī kabhī rahbaroñ se haarī

tere hijr ne ata ki ye ajib be-qarari

na sakat hai zabt-e-gham ki na majal-e-ashk-bari

mere somnat-e-dil par saf-e-ghaznawi se baDh kar

teri shabnami adaen tera tarz-e-gham-gusari

main kahan hun aur kya hun tu kahan hai aur kya hai

isi justuju mein guzri kabhi raat sari sari

ye satiza-gah-e-alam ye harif-e-zulf-e-barham

na junun-e-fitna-saman na KHirad ki hoshiyari

tu meri nazar mein kafir main teri nazar mein kafir

main asir-e-zulf-e-jaanan tu haris-e-shahryari

meri KHushk kisht-e-dil par tere lafz barq-e-muztar

ki dhuan dhadhak na jae teri tohmaton pe wari

ye mujaviran-e-ka'ba inhen kya hua KHudaya

tere doston se nafrat tere dushmanon se yari

koi rustami se kah de koi marhabi se kah de

main ghulam-e-mustafa hun mera shauq jaan-nisari

hai bayan-e-haal-e-gulshan ye jale jale nasheman

ye ghuTi-ghuTi fazaen ye gulon ki aah-o-zari

ai ghurur-e-banda-parwar tujhe ho jo KHauf-e-mahshar

to sarir-e-saltanat bhi hai kulah-e-KHardari

rah-e-zindagi mein 'bazmi' ye mata-e-dil ki bazi

kabhi rahzanon se haari kabhi rahbaron se haari