tere jamal-e-haqiqat ki tab hi na hui

tire jamāl-e-haqīqat kī taab hī na huī

hazār baar nigah kī magar kabhī na huī

tirī ḳhushī se agar ġham meñ bhī ḳhushī na huī

vo zindagī to mohabbat kī zindagī na huī

kahāñ vo shoḳh mulāqāt ḳhud se bhī na huī

bas ek baar huī aur phir kabhī na huī

vo ham haiñ ahl-e-mohabbat ki jaan se dil se

bahut buḳhār uThe aañkh shabnamī na huī

Thahar Thahar dil-e-betāb pyaar to kar luuñ

ab us ke ba.ad mulāqāt phir huī na huī

mire ḳhayāl se bhī aah mujh ko buad rahā

hazār tarah se chāhā barābarī na huī

ham apnī rindī-o-tā.at pe ḳhaak naaz kareñ

qubūl-e-hazrat-e-sultāñ huī huī na huī

koī baḌhe na baḌhe ham to jaan dete haiñ

phir aisī chashm-e-tavajjoh huī huī na huī

tamām harf-o-hikāyat tamām dīda-o-dil

is ehtimām pe bhī sharh-e-āshiqī na huī

fasurda-ḳhātirī-e-ishq ai ma.āz-allāh

ḳhayāl-e-yār se bhī kuchh shaguftagī na huī

tirī nigāh-e-karam ko bhī aazmā dekhā

aziyyatoñ meñ na honī thī kuchh kamī na huī

kisī kī mast-nigāhī ne haath thaam liyā

sharīk-e-hāl jahāñ merī be-ḳhudī na huī

sabā ye un se hamārā payām kah denā

ga.e ho jab se yahāñ sub.h o shaam hī na huī

vo kuchh sahī na sahī phir bhī zāhid-e-nādāñ

baḌe-baḌoñ se mohabbat meñ kāfirī na huī

idhar se bhī hai sivā kuchh udhar kī majbūrī

ki ham ne aah to kī un se aah bhī na huī

ḳhayāl-e-yār salāmat tujhe ḳhudā rakkhe

tire baġhair kabhī ghar meñ raushnī na huī

ga.e the ham bhī 'jigar' jalva-gāh-e-jānāñ meñ

vo pūchhte hī rahe ham se baat bhī na huī

tere jamal-e-haqiqat ki tab hi na hui

hazar bar nigah ki magar kabhi na hui

teri KHushi se agar gham mein bhi KHushi na hui

wo zindagi to mohabbat ki zindagi na hui

kahan wo shoKH mulaqat KHud se bhi na hui

bas ek bar hui aur phir kabhi na hui

wo hum hain ahl-e-mohabbat ki jaan se dil se

bahut buKHar uThe aankh shabnami na hui

Thahar Thahar dil-e-betab pyar to kar lun

ab us ke baad mulaqat phir hui na hui

mere KHayal se bhi aah mujh ko buad raha

hazar tarah se chaha barabari na hui

hum apni rindi-o-taat pe KHak naz karen

qubul-e-hazrat-e-sultan hui hui na hui

koi baDhe na baDhe hum to jaan dete hain

phir aisi chashm-e-tawajjoh hui hui na hui

tamam harf-o-hikayat tamam dida-o-dil

is ehtimam pe bhi sharh-e-ashiqi na hui

fasurda-KHatiri-e-ishq ai maaz-allah

KHayal-e-yar se bhi kuchh shaguftagi na hui

teri nigah-e-karam ko bhi aazma dekha

aziyyaton mein na honi thi kuchh kami na hui

kisi ki mast-nigahi ne hath tham liya

sharik-e-haal jahan meri be-KHudi na hui

saba ye un se hamara payam kah dena

gae ho jab se yahan subh o sham hi na hui

wo kuchh sahi na sahi phir bhi zahid-e-nadan

baDe-baDon se mohabbat mein kafiri na hui

idhar se bhi hai siwa kuchh udhar ki majburi

ki hum ne aah to ki un se aah bhi na hui

KHayal-e-yar salamat tujhe KHuda rakkhe

tere baghair kabhi ghar mein raushni na hui

gae the hum bhi 'jigar' jalwa-gah-e-jaanan mein

wo puchhte hi rahe hum se baat bhi na hui