tere jazbon ki garmi mein kami mahsus hoti hai

tire jazboñ kī garmī meñ kamī mahsūs hotī hai

ho tabdīlī koī bhī lāzmī mahsūs hotī hai

mirī dhaḌkan ke rauzan se sadā aatī hai nauhoñ kī

mujhe duniyā hī saarī mātamī mahsūs hotī hai

na-jāne kyoñ mire gāloñ pe do aañsū phisal aa.e

ki ab saarī fazā hī shabnamī mahsūs hotī hai

bichhī hai har taraf sabze kī jaise reshmī chādar

nigāhoñ ko har ik shai reshmī mahsūs hotī hai

kisī mahfil meñ koī jab tumhārā naam letā hai

na-jāne kyoñ mujhe dhaḌkan thamī mahsūs hotī hai

tire chhūne se bhī mujh par asar hotā nahīñ koī

badan meñ barf sī ab to jamī mahsūs hotī hai

tere jazbon ki garmi mein kami mahsus hoti hai

ho tabdili koi bhi lazmi mahsus hoti hai

meri dhaDkan ke rauzan se sada aati hai nauhon ki

mujhe duniya hi sari matami mahsus hoti hai

na-jaane kyon mere galon pe do aansu phisal aae

ki ab sari faza hi shabnami mahsus hoti hai

bichhi hai har taraf sabze ki jaise reshmi chadar

nigahon ko har ek shai reshmi mahsus hoti hai

kisi mahfil mein koi jab tumhaara nam leta hai

na-jaane kyon mujhe dhaDkan thami mahsus hoti hai

tere chhune se bhi mujh par asar hota nahin koi

badan mein barf si ab to jami mahsus hoti hai