tere KHayal ko zanjir karta rahta hun

tire ḳhayāl ko zanjīr kartā rahtā huuñ

maiñ apne ḳhvāb kī tābīr kartā rahtā huuñ

tamām rañg adhūre lage tire aage

so tujh ko lafz meñ tasvīr kartā rahtā huuñ

jo baat dil se zabāñ tak safar nahīñ kartī

usī ko sher meñ tahrīr kartā rahtā huuñ

dukhoñ ko apne chhupātā huuñ maiñ dafīnoñ sā

magar ḳhushī ko hama-gīr kartā rahtā huuñ

guzishta rut kā amiiñ huuñ na.e makān meñ bhī

purānī iiñT se ta.amīr kartā rahtā huuñ

mujhe bhī shauq hai duniyā ko zer karne kā

maiñ apne aap ko tasḳhīr kartā rahtā huuñ

zamīn hai ki badaltī nahīñ kabhī mehvar

maiñ kaisī kaisī tadābīr kartā rahtā huuñ

jo maiñ huuñ us ko chhupātā huuñ saare aalam se

jo maiñ nahīñ huuñ vo tash.hīr kartā rahtā huuñ

tere KHayal ko zanjir karta rahta hun

main apne KHwab ki tabir karta rahta hun

tamam rang adhure lage tere aage

so tujh ko lafz mein taswir karta rahta hun

jo baat dil se zaban tak safar nahin karti

usi ko sher mein tahrir karta rahta hun

dukhon ko apne chhupata hun main dafinon sa

magar KHushi ko hama-gir karta rahta hun

guzishta rut ka amin hun nae makan mein bhi

purani inT se tamir karta rahta hun

mujhe bhi shauq hai duniya ko zer karne ka

main apne aap ko tasKHir karta rahta hun

zamin hai ki badalti nahin kabhi mehwar

main kaisi kaisi tadabir karta rahta hun

jo main hun us ko chhupata hun sare aalam se

jo main nahin hun wo tashhir karta rahta hun