tere KHayal se aankhen milane wali hun

tire ḳhayāl se āñkheñ milāne vaalī huuñ

na.e sarūp kā jaadū jagāne vaalī huuñ

maiñ saiñt saiñt ke rakkhe hue lihāfoñ se

tumhāre lams kī garmī churāne vaalī huuñ

use jo dhuup liye dil ke gaañv meñ utrā

rahaT se chaah kā paanī pilāne vaalī huuñ

kaho ki chhāñv mirī ḳhud sameT le aa kar

maiñ ab ghaTā kā prānda hilāne vaalī huuñ

jahāñ pe aam kī guThlī dabī thī bhūbal meñ

vahīñ pe apne dukhoñ ko tapāne vaalī huuñ

is alganī pe akele larazte qatre ko

banā ke 'naināñ' maiñ surma lagāne vaalī huuñ

tere KHayal se aankhen milane wali hun

nae sarup ka jadu jagane wali hun

main saint saint ke rakkhe hue lihafon se

tumhaare lams ki garmi churane wali hun

use jo dhup liye dil ke ganw mein utra

rahaT se chah ka pani pilane wali hun

kaho ki chhanw meri KHud sameT le aa kar

main ab ghaTa ka pranda hilane wali hun

jahan pe aam ki guThli dabi thi bhubal mein

wahin pe apne dukhon ko tapane wali hun

is algani pe akele larazte qatre ko

bana ke 'nainan' main surma lagane wali hun