tere mariz ko ai jaan shifa se kya matlab

tire marīz ko ai jaañ shifā se kyā matlab

vo ḳhush hai dard meñ us ko davā se kyā matlab

faqat jo zaat ke haiñ dil se chāhne vaale

unheñ karishma-o-nāz-o-adā se kyā matlab

nihāl-e-tāza raheñ nāmiya ke minnat-kash

daraḳht-e-ḳhushk ko nashv-o-numā se kyā matlab

murād-o-maqsad-o-matlab haiñ sab havas ke saath

havas hī mar ga.ī phir mudda.ā se kyā matlab

mujhe vo pūchhe to us kā hī lutf hai varna

vo bādshāh hai use mujh gadā se kyā matlab

jo apne yaar ke jaur-o-jafā meñ haiñ masrūr

unheñ phir aur ke mehr-o-vafā se kyā matlab

razā-e-dost jinheñ chāhiye ba-har-sūrat

'nazīr' phir unheñ apnī razā se kyā matlab

tere mariz ko ai jaan shifa se kya matlab

wo KHush hai dard mein us ko dawa se kya matlab

faqat jo zat ke hain dil se chahne wale

unhen karishma-o-naz-o-ada se kya matlab

nihaal-e-taza rahen namiya ke minnat-kash

daraKHt-e-KHushk ko nashw-o-numa se kya matlab

murad-o-maqsad-o-matlab hain sab hawas ke sath

hawas hi mar gai phir muddaa se kya matlab

mujhe wo puchhe to us ka hi lutf hai warna

wo baadshah hai use mujh gada se kya matlab

jo apne yar ke jaur-o-jafa mein hain masrur

unhen phir aur ke mehr-o-wafa se kya matlab

raza-e-dost jinhen chahiye ba-har-surat

'nazir' phir unhen apni raza se kya matlab