tere nisar na dekhi koi KHushi maine

tire nisār na dekhī koī ḳhushī maiñ ne

ki ab to maut ko samjhā hai zindagī maiñ ne

ye dil meñ soch ke tauba bhī toḌ dī maiñ ne

na jaane kyā kahe saaqī agar na pī maiñ ne

koī balā mire sar par zarūr aa.egī

ki terī zulf-e-pareshāñ sañvār dī maiñ ne

sahar huī shab-e-va.ada kā iztirāb gayā

sitāre chhup ga.e gul kar dī raushnī maiñ ne

sivā.e dil mujhe dair-o-haram se kyā matlab

jagah huzūr ke milne kī DhūñD lī maiñ ne

jahāñ chalā diyā sāġhar kā daur ai vaa.iz

vahīñ pe gardish-e-ayyām rok dī maiñ ne

balā.eñ lene pe aap itne ho ga.e barham

huzūr kaun sī jāgīr chhīn lī maiñ ne

duā.eñ do mujhe dar dar junūñ meñ phir phir kar

tumhārī shohrateñ kar diiñ galī maiñ ne

javāb us kā to shāyad falak bhī de na sake

vo bandagī jo tirī rahguzar meñ kī maiñ ne

vo jaane kaise pata de ga.e the gulshan kā

na chhoḌā phuul na chhoḌī kalī kalī maiñ ne

'qamar' vo niiñd meñ the un ko kyā ḳhabar hogī

ki un pe shab ko luTā.ī hai chāñdnī maiñ ne

tere nisar na dekhi koi KHushi main ne

ki ab to maut ko samjha hai zindagi main ne

ye dil mein soch ke tauba bhi toD di main ne

na jaane kya kahe saqi agar na pi main ne

koi bala mere sar par zarur aaegi

ki teri zulf-e-pareshan sanwar di main ne

sahar hui shab-e-wada ka iztirab gaya

sitare chhup gae gul kar di raushni main ne

siwae dil mujhe dair-o-haram se kya matlab

jagah huzur ke milne ki DhunD li main ne

jahan chala diya saghar ka daur ai waiz

wahin pe gardish-e-ayyam rok di main ne

balaen lene pe aap itne ho gae barham

huzur kaun si jagir chhin li main ne

duaen do mujhe dar dar junun mein phir phir kar

tumhaari shohraten kar din gali main ne

jawab us ka to shayad falak bhi de na sake

wo bandagi jo teri rahguzar mein ki main ne

wo jaane kaise pata de gae the gulshan ka

na chhoDa phul na chhoDi kali kali main ne

'qamar' wo nind mein the un ko kya KHabar hogi

ki un pe shab ko luTai hai chandni main ne