tere ruKH ka kise sauda nahin hai

tire ruḳh kā kise saudā nahīñ hai

gul-e-lāla talak sahrā-nashīñ hai

phirā hai aap vo mah-rū hamārā

tirā ai āsmāñ shikva nahīñ hai

kahīñ aisā na ho uTThe na talvār

yahī Dar hai ki qātil nāznīñ hai

na pūchho mere aañsū tum na pūchho

kahegā koī tum ko ḳhosha-chīñ hai

adab se pā-barahna phirte haiñ ham

junūñ farsh-e-ilāhī ye zamīñ hai

burā sab dushmanoñ kā chāhte haiñ

maiñ ḳhush huuñ jaise dil andoh-gīñ hai

rahe mazmūn-e-ġham kī tarah is meñ

hamārā ghar hai yā bait-e-hazīñ hai

jahāñ hai jalva-gar vo ġhairat-e-māh

ilāhī āsmāñ hai yā zamīñ hai

banāyā tujh ko aisā ḳhūbsūrat

ki nāzāñ tujh pe sūrat-āfrīñ hai

haiñ ishq-e-zulf meñ a.azā bhī dushman

hamārā haath mār-e-āstīñ hai

na niklā be tire maiñ ghar se bāhar

nigah tak chashm meñ ḳhalvat-nashīñ hai

falak jo chāhe ham par zulm kar le

abhī to zabt-e-āh-e-ātishīñ hai

paḌā hai tafraqa be-tābiyoñ se

'vazīr' ab maiñ kahīñ huuñ dil kahīñ hai

tere ruKH ka kise sauda nahin hai

gul-e-lala talak sahra-nashin hai

phira hai aap wo mah-ru hamara

tera ai aasman shikwa nahin hai

kahin aisa na ho uTThe na talwar

yahi Dar hai ki qatil naznin hai

na puchho mere aansu tum na puchho

kahega koi tum ko KHosha-chin hai

adab se pa-barahna phirte hain hum

junun farsh-e-ilahi ye zamin hai

bura sab dushmanon ka chahte hain

main KHush hun jaise dil andoh-gin hai

rahe mazmun-e-gham ki tarah is mein

hamara ghar hai ya bait-e-hazin hai

jahan hai jalwa-gar wo ghairat-e-mah

ilahi aasman hai ya zamin hai

banaya tujh ko aisa KHubsurat

ki nazan tujh pe surat-afrin hai

hain ishq-e-zulf mein aaza bhi dushman

hamara hath mar-e-astin hai

na nikla be tere main ghar se bahar

nigah tak chashm mein KHalwat-nashin hai

falak jo chahe hum par zulm kar le

abhi to zabt-e-ah-e-atishin hai

paDa hai tafraqa be-tabiyon se

'wazir' ab main kahin hun dil kahin hai