teri barq-pash-nigah se tere hashr-KHez-KHiram se

tirī barq-pāsh-nigāh se tire hashr-ḳhez-ḳhirām se

ba-sukūn-e-qalb guzar gayā maiñ har ek aise maqām se

mirī zindagī ke ye marhale hama-ittiqā hama-bandagī

mujhe kaif un kī nazar se hai koī vāsta nahīñ jaam se

vo lajā ga.e vo jhijhak ga.e vo Thahar ga.e kisī soch meñ

sar-e-rah kisī ne jo daf.atan unheñ dī sadā mire naam se

maiñ huuñ sham-e-mahfil-e-jāvedāñ mirī zindagī nahīñ muḳhtasar

maiñ charāġh-e-rāhguzar nahīñ jo bujhā bujhā sā ho shaam se

vo lihāz-e-pīr-e-muġhāñ nahīñ vo mazāq-e-bāda-kashī kahāñ

hameñ phir atā ho mai-e-kuhan na.e daur meñ na.e jaam se

tirā zikr sun ke taḌap uThā tirā naam le ke maiñ ro diyā

mujhe ek nisbat-e-ḳhās hai tire zikr se tire naam se

na rahā 'mushīr' hī tishna-lab sar-e-bazm sāqī-e-be-ḳhabar

koī bāda-kash nahīñ mutma.in tire mai-kade ke nizām se

teri barq-pash-nigah se tere hashr-KHez-KHiram se

ba-sukun-e-qalb guzar gaya main har ek aise maqam se

meri zindagi ke ye marhale hama-ittiqa hama-bandagi

mujhe kaif un ki nazar se hai koi wasta nahin jam se

wo laja gae wo jhijhak gae wo Thahar gae kisi soch mein

sar-e-rah kisi ne jo dafatan unhen di sada mere nam se

main hun sham-e-mahfil-e-jawedan meri zindagi nahin muKHtasar

main charagh-e-rahguzar nahin jo bujha bujha sa ho sham se

wo lihaz-e-pir-e-mughan nahin wo mazaq-e-baada-kashi kahan

hamein phir ata ho mai-e-kuhan nae daur mein nae jam se

tera zikr sun ke taDap uTha tera nam le ke main ro diya

mujhe ek nisbat-e-KHas hai tere zikr se tere nam se

na raha 'mushir' hi tishna-lab sar-e-bazm saqi-e-be-KHabar

koi baada-kash nahin mutmain tere mai-kade ke nizam se