teri Dagar ko main apni nazar mein rakhti hun

tirī Dagar ko maiñ apnī nazar meñ rakhtī huuñ

hazār phuul tirī rāhguzar meñ rakhtī huuñ

maiñ terī yaad ko āñchal meñ bāñdh laa.ī huuñ

tire ḳhayāl ko zād-e-safar meñ rakhtī huuñ

tū ek pal bhī judā mujh se ho nahīñ saktā

maiñ terī yaad ko shām-o-sahar meñ rakhtī huuñ

mirī vafāoñ kī garmī se tū bhī pighlegā

ik aisā sho.ala maiñ apne jigar meñ rakhtī huuñ

mujhe Darā.egā kaise ye pāniyoñ kā mizāj

maiñ apnī kashtī hamesha bhañvar meñ rakhtī huuñ

talāsh karte ho tum mujh ko chāñd ke andar

maiñ apne chehre kā partav qamar meñ rakhtī huuñ

'iram' ne sheroñ se sab ko asiir aise kiyā

ki jaise jaadū maiñ apne hunar meñ rakhtī huuñ

teri Dagar ko main apni nazar mein rakhti hun

hazar phul teri rahguzar mein rakhti hun

main teri yaad ko aanchal mein bandh lai hun

tere KHayal ko zad-e-safar mein rakhti hun

tu ek pal bhi juda mujh se ho nahin sakta

main teri yaad ko sham-o-sahar mein rakhti hun

meri wafaon ki garmi se tu bhi pighlega

ek aisa shoala main apne jigar mein rakhti hun

mujhe Daraega kaise ye paniyon ka mizaj

main apni kashti hamesha bhanwar mein rakhti hun

talash karte ho tum mujh ko chand ke andar

main apne chehre ka partaw qamar mein rakhti hun

'iram' ne sheron se sab ko asir aise kiya

ki jaise jadu main apne hunar mein rakhti hun