teri hi shakl ke but hain kai tarashe hue

tirī hī shakl ke but haiñ ka.ī tarāshe hue

na pūchh ka.aba-e-dil meñ bhī kyā tamāshe hue

hamārī laash ko maidān-e-ishq meñ pahchān

bujhī huī sī haiñ āñkheñ to dil ḳharāshe hue

ba-vaqt-e-vasl koī baat bhī na kī ham ne

zabāñ thī sūkhī huī hoñT irti.āshe hue

vo kaise baat ko toleñge aur boleñge

jo pal meñ tole hue aur pal meñ māshe hue

mazāq chhoḌ batā ye ki mujh se kyā parda

tire nuqūsh haiñ saare mire talāshe hue

maiñ tere shahr se niklā thā ain us lamha

tire nikāh pe taqsīm jab batāshe hue

teri hi shakl ke but hain kai tarashe hue

na puchh kaba-e-dil mein bhi kya tamashe hue

hamari lash ko maidan-e-ishq mein pahchan

bujhi hui si hain aankhen to dil KHarashe hue

ba-waqt-e-wasl koi baat bhi na ki hum ne

zaban thi sukhi hui honT irtiashe hue

wo kaise baat ko tolenge aur bolenge

jo pal mein tole hue aur pal mein mashe hue

mazaq chhoD bata ye ki mujh se kya parda

tere nuqush hain sare mere talashe hue

main tere shahr se nikla tha ain us lamha

tere nikah pe taqsim jab batashe hue