teri justuju mein nikle to ajab sarab dekhe

tirī justujū meñ nikle to 'ajab sarāb dekhe

kabhī shab ko din kahā hai kabhī din meñ ḳhvāb dekhe

mire dil meñ is tarah hai tirī aarzū ḳhirāmāñ

koī nāznīñ ho jaise jo khulī kitāb dekhe

jise merī aarzū ho jo ḳharāb-e-kū-ba-kū ho

mujhe dekhne se pahle tujhe be-naqāb dekhe

jise kuchh nazar na aayā ho jahāñ rang-o-bū meñ

vo khilā gulāb dekhe vo tirā shabāb dekhe

do-jahāñ ko lā Dubo.e vo zarā sī aabjū meñ

tirī chashm-e-surmagīñ ko jo koī pur-āb dekhe

yuuñ Thahar Thahar ke guzrī shab-e-intizār yaaro

ki sahar ke hote hote ka.ī ham ne ḳhvāb dekhe

mujhe dekhnā ho jas ko mire haal par na jaa.e

mirā zauq-o-shauq dekhe mirā intiḳhāb dekhe

teri justuju mein nikle to 'ajab sarab dekhe

kabhi shab ko din kaha hai kabhi din mein KHwab dekhe

mere dil mein is tarah hai teri aarzu KHiraman

koi naznin ho jaise jo khuli kitab dekhe

jise meri aarzu ho jo KHarab-e-ku-ba-ku ho

mujhe dekhne se pahle tujhe be-naqab dekhe

jise kuchh nazar na aaya ho jahan rang-o-bu mein

wo khila gulab dekhe wo tera shabab dekhe

do-jahan ko la Duboe wo zara si aabju mein

teri chashm-e-surmagin ko jo koi pur-ab dekhe

yun Thahar Thahar ke guzri shab-e-intizar yaro

ki sahar ke hote hote kai hum ne KHwab dekhe

mujhe dekhna ho jas ko mere haal par na jae

mera zauq-o-shauq dekhe mera intiKHab dekhe