teri qudrat ki qudrat kaun pa sakta hai kya qudrat

tirī qudrat kī qudrat kaun pā saktā hai kyā qudrat

tire aage koī qādir kahā saktā hai kyā qudrat

tū vo yaktā-e-mutlaq hai ki yaktā.ī meñ ab terī

koī shirk-e-duī kā harf lā saktā hai kyā qudrat

zamīñ se āsmāñ tak tū ne jo jo rañg rañge haiñ

ye rañg-āmeziyāñ koī dikhā saktā hai kyā qudrat

hazāroñ gul hazāroñ gul-badan tū ne banā Daale

koī miTTī se aise gul khilā saktā hai kyā qudrat

hue haiñ nuur se jin ke zamīn o āsmāñ paidā

koī ye chāñd ye sūraj banā saktā hai kyā qudrat

havā ke farq par koī banā kar abr kā ḳhema

tanābeñ tār-e-bārāñ kī lagā saktā hai kyā qudrat

jam o askandar o daarā o kekā.ūs o keḳhusrau

koī is Dhab ke dil bādal banā saktā hai kyā qudrat

kiyā namrūd ne go kibr se da.avā ḳhudā.ī kā

kahīñ us kā ye da.avā pesh jā saktā hai kyā qudrat

nikālā tere ik pushte ne kafshīñ mār-e-maġhz us kā

sivā tere ḳhudā koī kahā saktā hai kyā qudrat

nikāle lakḌiyoñ se tū ne jis jis lutf ke meve

koī peḌoñ meñ ye peḌe lagā saktā hai kyā qudrat

tire hī ḳhvān-e-ne.amat se hai sab kī parvarish varna

koī chyūñTī se hāthī tak khilā saktā hai kyā qudrat

hamārī zindagānī ko baġhair az terī qudrat ke

koī paanī ko paanī kar bahā saktā hai kyā qudrat

tire husn-e-tajalli kā jahāñ zarra jhamak jaave

to phir muusā koī vaañ taab lā saktā hai kyā qudrat

dam-e-īsā meñ vo tāsīr thī terī hī qudrat kī

vagarna koī murde ko jilā saktā hai kyā qudrat

tū vo mahbūb chanchal hai ki bār-e-nāz ko tere

baġhair-az-mustafā koī uThā saktā hai kyā qudrat

'nazīr' ab tab.a par jab tak na faizān-e-ilāhī ho

koī ye lafz ye mazmūñ banā saktā hai kyā qudrat

teri qudrat ki qudrat kaun pa sakta hai kya qudrat

tere aage koi qadir kaha sakta hai kya qudrat

tu wo yakta-e-mutlaq hai ki yaktai mein ab teri

koi shirk-e-dui ka harf la sakta hai kya qudrat

zamin se aasman tak tu ne jo jo rang range hain

ye rang-ameziyan koi dikha sakta hai kya qudrat

hazaron gul hazaron gul-badan tu ne bana Dale

koi miTTi se aise gul khila sakta hai kya qudrat

hue hain nur se jin ke zamin o aasman paida

koi ye chand ye suraj bana sakta hai kya qudrat

hawa ke farq par koi bana kar abr ka KHema

tanaben tar-e-baran ki laga sakta hai kya qudrat

jam o askandar o dara o kekaus o keKHusrau

koi is Dhab ke dil baadal bana sakta hai kya qudrat

kiya namrud ne go kibr se dawa KHudai ka

kahin us ka ye dawa pesh ja sakta hai kya qudrat

nikala tere ek pushte ne kafshin mar-e-maghz us ka

siwa tere KHuda koi kaha sakta hai kya qudrat

nikale lakDiyon se tu ne jis jis lutf ke mewe

koi peDon mein ye peDe laga sakta hai kya qudrat

tere hi KHwan-e-neamat se hai sab ki parwarish warna

koi chyunTi se hathi tak khila sakta hai kya qudrat

hamari zindagani ko baghair az teri qudrat ke

koi pani ko pani kar baha sakta hai kya qudrat

tere husn-e-tajalli ka jahan zarra jhamak jawe

to phir musa koi wan tab la sakta hai kya qudrat

dam-e-isa mein wo tasir thi teri hi qudrat ki

wagarna koi murde ko jila sakta hai kya qudrat

tu wo mahbub chanchal hai ki bar-e-naz ko tere

baghair-az-mustafa koi uTha sakta hai kya qudrat

'nazir' ab taba par jab tak na faizan-e-ilahi ho

koi ye lafz ye mazmun bana sakta hai kya qudrat