teri yaad mein kab qayamat na TuTi tere gham mein kab hashr barpa na dekha

tirī yaad meñ kab qayāmat na TuuTī tire ġham meñ kab hashr barpā na dekhā

ba-juz ik nigāh-e-masīhā-nafas ke mohabbat ke māroñ ne kyā kyā na dekhā

bahut sair kī bāġh-e-jannat kī ham ne magar kuchh mazā zindagī kā na dekhā

kisī dil meñ dard-e-mohabbat na paayā kisī dil meñ dāġh-e-tamannā na dekhā

bahut mard-e-maidāñ bhī duniyā meñ dekhe shujā'at pe nāzāñ bhī duniyā meñ dekhe

magar choT sah jaa.e tīr-e-nazar kī ye dil ye kalejā kisī kā na dekhā

yahī hai nazārā to kyā hai nazārā na shān-e-jamālī na shān-e-jalālī

ye dhuñdlā sā partav ye mastūr jalva barābar hai ham ko to dekhā na dekhā

junūn-e-mohabbat meñ dīvāngī meñ tirī be-ruḳhī kā bhī maiñ qadr-dāñ huuñ

baḌā tū ne ehsān mujh par kiyā ye tamāshā banā kar tamāshā na dekhā

tire āstāñ kā pata kis se paa.eñ kare rahbarī kaun bhaTke huoñ kī

ye rāh-e-talab hai ki rāh-e-adam hai kisī kā bhī naqsh-e-kaf-e-pā na dekhā

mohabbat kahāñ ye to bechārgī hai sitam bhī saheñ phir karam is ko samjheñ

ye jabr is liye kar liyā hai gavārā ki is ke sivā koī chārā na dekhā

niyāz-e-mohabbat se ye be-niyāzī ḳhulūs-e-mohabbat se itnā taġhāful

mirā dard tum ne mirā haal tum ne na jaanā na samjhā na pūchhā na dekhā

tumheñ 'josh' ham ḳhuub pahchānte haiñ tumhārī balā-noshiyāñ jānte haiñ

kahāñ tum kahāñ pārsā.ī kā jaama kabhī ham ne aisā dikhāvā na dekhā

teri yaad mein kab qayamat na TuTi tere gham mein kab hashr barpa na dekha

ba-juz ek nigah-e-masiha-nafas ke mohabbat ke maron ne kya kya na dekha

bahut sair ki bagh-e-jannat ki hum ne magar kuchh maza zindagi ka na dekha

kisi dil mein dard-e-mohabbat na paya kisi dil mein dagh-e-tamanna na dekha

bahut mard-e-maidan bhi duniya mein dekhe shuja'at pe nazan bhi duniya mein dekhe

magar choT sah jae tir-e-nazar ki ye dil ye kaleja kisi ka na dekha

yahi hai nazara to kya hai nazara na shan-e-jamali na shan-e-jalali

ye dhundla sa partaw ye mastur jalwa barabar hai hum ko to dekha na dekha

junun-e-mohabbat mein diwangi mein teri be-ruKHi ka bhi main qadr-dan hun

baDa tu ne ehsan mujh par kiya ye tamasha bana kar tamasha na dekha

tere aastan ka pata kis se paen kare rahbari kaun bhaTke huon ki

ye rah-e-talab hai ki rah-e-adam hai kisi ka bhi naqsh-e-kaf-e-pa na dekha

mohabbat kahan ye to bechaargi hai sitam bhi sahen phir karam is ko samjhen

ye jabr is liye kar liya hai gawara ki is ke siwa koi chaara na dekha

niyaz-e-mohabbat se ye be-niyazi KHulus-e-mohabbat se itna taghaful

mera dard tum ne mera haal tum ne na jaana na samjha na puchha na dekha

tumhein 'josh' hum KHub pahchante hain tumhaari bala-noshiyan jaante hain

kahan tum kahan parsai ka jama kabhi hum ne aisa dikhawa na dekha