tishna-lab koi jo sar-gashta sarabon mein raha

tishna-lab koī jo sar-gashta sarāboñ meñ rahā

basta-e-vahm-o-gumāñ bhāgtā ḳhvāboñ meñ rahā

dil kī āvāra-mizājī kā gilā kyā kiije

ḳhāna-barbād rahā ḳhāna-ḳharāboñ meñ rahā

ek vo harf-e-junūñ naqsh-gar-e-lauh-o-qalam

ek vo bāb-e-ḳhirad band kitāboñ meñ rahā

be-hisī vo hai ki is daur meñ jiine kā mazā

na gunāhoñ meñ rahā aur na savāboñ meñ rahā

jam.a kartā rahā ye sūd-o-ziyāñ ke a.adād

umr bhar zehn-e-bashar uljhā hisāboñ meñ rahā

ab koī aur hī shai vaj.h-e-nashāt-e-dil ho

nashsha-o-kaif-e-sharar ab na sharāboñ meñ rahā

tishna-lab koi jo sar-gashta sarabon mein raha

basta-e-wahm-o-guman bhagta KHwabon mein raha

dil ki aawara-mizaji ka gila kya kije

KHana-barbaad raha KHana-KHarabon mein raha

ek wo harf-e-junun naqsh-gar-e-lauh-o-qalam

ek wo bab-e-KHirad band kitabon mein raha

be-hisi wo hai ki is daur mein jine ka maza

na gunahon mein raha aur na sawabon mein raha

jama karta raha ye sud-o-ziyan ke aadad

umr bhar zehn-e-bashar uljha hisabon mein raha

ab koi aur hi shai wajh-e-nashat-e-dil ho

nashsha-o-kaif-e-sharar ab na sharabon mein raha