titli qafas mein qaid-e-saba DhunDhti rahi

titlī qafas meñ qaid-e-sabā DhūñDhtī rahī

maiñ shahr-e-nañg meñ bhī ridā DhūñDhtī rahī

vo titliyoñ meñ mast bahut mutma.in sā thā

jis ko chaman meñ merī sadā DhūñDhtī rahī

rut kī tarah mizāj badal kar chalā gayā

vo bevafā thā us meñ vafā DhūñDhtī rahī

taḳht-e-munāfiqat pe vahī hukmarān thā

bahr-e-ḳhulūs jis ko sadā DhūñDhtī rahī

josh-e-junūñ ke haath jise daan kar chukī

phir maiñ zarūratan vo anā DhūñDhtī rahī

dil par lage jo zaḳhm kahāñ mundamil hue

maiñ shahr shahr phirtī davā DhūñDhtī rahī

bastī meñ ek bhī na vafādār mil sakā

maiñ dar-ba-dar bhaTaktī vafā DhūñDhtī rahī

sail-e-balā bhañvar meñ jahāñ chhoḌ kar gayā

maiñ nāḳhudā ke saath ḳhudā DhūñDhtī rahī

dīvār-e-dil se merī churā ke vo le gayā

jagmag sī raushnī vo diyā DhūñDhtī rahī

merī hatheliyoñ pe rache zaḳhm zaḳhm rañg

'bāno' maiñ in meñ bū-e-hinā DhūñDhtī rahī

titli qafas mein qaid-e-saba DhunDhti rahi

main shahr-e-nang mein bhi rida DhunDhti rahi

wo titliyon mein mast bahut mutmain sa tha

jis ko chaman mein meri sada DhunDhti rahi

rut ki tarah mizaj badal kar chala gaya

wo bewafa tha us mein wafa DhunDhti rahi

taKHt-e-munafiqat pe wahi hukmaran tha

bahr-e-KHulus jis ko sada DhunDhti rahi

josh-e-junun ke hath jise dan kar chuki

phir main zaruratan wo ana DhunDhti rahi

dil par lage jo zaKHm kahan mundamil hue

main shahr shahr phirti dawa DhunDhti rahi

basti mein ek bhi na wafadar mil saka

main dar-ba-dar bhaTakti wafa DhunDhti rahi

sail-e-bala bhanwar mein jahan chhoD kar gaya

main naKHuda ke sath KHuda DhunDhti rahi

diwar-e-dil se meri chura ke wo le gaya

jagmag si raushni wo diya DhunDhti rahi

meri hatheliyon pe rache zaKHm zaKHm rang

'bano' main in mein bu-e-hina DhunDhti rahi