titliyon ka rang ho ya jhumte baadal ka rang

titliyoñ kā rang ho yā jhūmte bādal kā rang

ham ne har ik rang ko jaanā tire āñchal kā rang

terī āñkhoñ kī chamak hai yā sitāroñ kī ziyā

raat kā hai ghup añdherā yā tire kājal kā rang

dhaḌkanoñ ke taal par vo haal apne dil kā hai

jaise gorī ke thirakte paañv meñ paa.el kā rang

pheñknā tum soch kar lafzoñ kā ye kaḌvā gulāl

phail jaatā hai kabhī sadiyoñ pe bhī ik pal kā rang

aah ye rangīn mausam ḳhuun kī barsāt kā

chhā rahā hai 'aql par jazbāt kī halchal kā rang

ab to shabnam kā har ik motī hai kankar kī tarah

haañ usī gulshan pe chhāyā thā kabhī maḳhmal kā rang

phir rahe haiñ log hāthoñ meñ liye ḳhanjar khule

kūche kūche meñ ab aatā hai nazar maqtal kā rang

chaar jānib jis kī rā'nā.ī ke charche haiñ 'qatīl'

jaane kab dekheñge ham us aane vaalī kal kā rang

titliyon ka rang ho ya jhumte baadal ka rang

hum ne har ek rang ko jaana tere aanchal ka rang

teri aankhon ki chamak hai ya sitaron ki ziya

raat ka hai ghup andhera ya tere kajal ka rang

dhaDkanon ke tal par wo haal apne dil ka hai

jaise gori ke thirakte panw mein pael ka rang

phenkna tum soch kar lafzon ka ye kaDwa gulal

phail jata hai kabhi sadiyon pe bhi ek pal ka rang

aah ye rangin mausam KHun ki barsat ka

chha raha hai 'aql par jazbaat ki halchal ka rang

ab to shabnam ka har ek moti hai kankar ki tarah

han usi gulshan pe chhaya tha kabhi maKHmal ka rang

phir rahe hain log hathon mein liye KHanjar khule

kuche kuche mein ab aata hai nazar maqtal ka rang

chaar jaanib jis ki ra'nai ke charche hain 'qatil'

jaane kab dekhenge hum us aane wali kal ka rang