toD kar ahd-e-karam na-ashna ho jaiye

toḌ kar ahd-e-karam nā-āshnā ho jā.iye

banda-parvar jā.iye achchhā ḳhafā ho jā.iye

mere uzr-e-jurm par mutlaq na kiije iltifāt

balki pahle se bhī baḌh kar kaj-adā ho jā.iye

ḳhātir-e-mahrūm ko kar dījiye mahv-e-alam

dar-pa-e-īzā-e-jān-e-mubtalā ho jā.iye

raah meñ miliye kabhī mujh se to az-rāh-e-sitam

hoñT apnā kaaT kar fauran judā ho jā.iye

gar nigāh-e-shauq ko mahv-e-tamāshā dekhiye

qahr kī nazroñ se masrūf-e-sazā ho jā.iye

merī tahrīr-e-nadāmat kā na diije kuchh javāb

dekh liije aur taġhāful-āshnā ho jā.iye

mujh se tanhā.ī meñ gar miliye to diije gāliyāñ

aur bazm-e-ġhair meñ jān-e-hayā ho jā.iye

haañ yahī merī vafā-e-be-asar kī hai sazā

aap kuchh is se bhī baḌh kar pur-jafā ho jā.iye

jī meñ aatā hai ki us shoḳh-e-taġhāful-kesh se

ab na miliye phir kabhī aur bevafā ho jā.iye

kāvish-e-dard-e-jigar kī lazzatoñ ko bhuul kar

mā.il-e-ārām o mushtāq-e-shifā ho jā.iye

ek bhī armāñ na rah jaa.e dil-e-māyūs meñ

yaanī āḳhir be-niyāz-e-mudda.ā ho jā.iye

bhuul kar bhī us sitam-parvar kī phir aa.e na yaad

is qadar begāna-e-ahd-e-vafā ho jā.iye

haa.e rī be-iḳhtiyārī ye to sab kuchh ho magar

us sarāpā naaz se kyūñkar ḳhafā ho jā.iye

chāhtā hai mujh ko tū bhūle na bhūlūñ maiñ tujhe

tere is tarz-e-taġhāful ke fidā ho jā.iye

kashmakash-hā-e-alam se ab ye 'hasrat' jī meñ hai

chhuT ke in jhagḌoñ se mehmān-e-qazā ho jā.iye

toD kar ahd-e-karam na-ashna ho jaiye

banda-parwar jaiye achchha KHafa ho jaiye

mere uzr-e-jurm par mutlaq na kije iltifat

balki pahle se bhi baDh kar kaj-ada ho jaiye

KHatir-e-mahrum ko kar dijiye mahw-e-alam

dar-pa-e-iza-e-jaan-e-mubtala ho jaiye

rah mein miliye kabhi mujh se to az-rah-e-sitam

honT apna kaT kar fauran juda ho jaiye

gar nigah-e-shauq ko mahw-e-tamasha dekhiye

qahr ki nazron se masruf-e-saza ho jaiye

meri tahrir-e-nadamat ka na dije kuchh jawab

dekh lije aur taghaful-ashna ho jaiye

mujh se tanhai mein gar miliye to dije galiyan

aur bazm-e-ghair mein jaan-e-haya ho jaiye

han yahi meri wafa-e-be-asar ki hai saza

aap kuchh is se bhi baDh kar pur-jafa ho jaiye

ji mein aata hai ki us shoKH-e-taghaful-kesh se

ab na miliye phir kabhi aur bewafa ho jaiye

kawish-e-dard-e-jigar ki lazzaton ko bhul kar

mail-e-aram o mushtaq-e-shifa ho jaiye

ek bhi arman na rah jae dil-e-mayus mein

yani aaKHir be-niyaz-e-muddaa ho jaiye

bhul kar bhi us sitam-parwar ki phir aae na yaad

is qadar begana-e-ahd-e-wafa ho jaiye

hae ri be-iKHtiyari ye to sab kuchh ho magar

us sarapa naz se kyunkar KHafa ho jaiye

chahta hai mujh ko tu bhule na bhulun main tujhe

tere is tarz-e-taghaful ke fida ho jaiye

kashmakash-ha-e-alam se ab ye 'hasrat' ji mein hai

chhuT ke in jhagDon se mehman-e-qaza ho jaiye