toDunga KHum-e-baada-e-angur ki gardan

toḌūñgā ḳhum-e-bāda-e-añgūr kī gardan

rakh dūñgā vahāñ kaaT ke ik huur kī gardan

ḳhuddār kī ban shakl alif haa.e anal-haq

nit chāhtī haiñ ik na.ī mansūr kī gardan

kyuuñ sāqī-e-ḳhurshīd-e-jabīñ kyā hai nasha huuñ

sab yūñhī chaḌhā jā.ūñ mai-e-nūr kī gardan

uchhlī hui varzish se tarī DañD pe machhlī

hai nām-e-ḳhudā jaisī saqanqūr kī gardan

thā shaḳhs jo gardan-zadanī us se ye bole

ab dījiye hai denī jo manzūr kī gardan

ā.īne kī gar sair kare shaiḳh ye dekhe

sar ḳhurs kā muñh ḳhuuk kā lañgūr kī gardan

yuuñ panja-e-mizhgāñ meñ paḌā hai ye marā dil

juuñ changul-e-shahbāz meñ usfūr kī gardan

tab ālam-e-mastī kā mazā hai ki paḌī ho

gardan pe mirī us but-e-maḳhmūr kī gardan

baiThā ho jahāñ paas sulaimān ke aasif

vaañ kyuuñ na jhukī qaisar o faġhfūr kī gardan

bheñchī hai baġhal apnī maiñ is zor se jo ishq

to toḌne par hai kisī majbūr kī gardan

ai mast ye kyā qahr hai ḳhisht-e-sar-e-ḳhum se

kyuuñ tū ne'' surāhī kī bhalā chuur kī gardan

mahfil meñ tarī sham.a banī mom kī maryam

pighlī paḌī hai us kī vo kāfūr kī gardan

ai dev-e-safed-e-saharī kaash tū toḌe

ik mukke se ḳhur ke shab-e-dījūr kī gardan

jab kushta-e-ulfat ko uThāyā to alam se

bas hil ga.ī us qātil-e-maġhrūr kī gardan

be-sāḳhta bolā ki are haath to Tuk do

Dhalke na mire āshiq-e-maġhfūr kī gardan

hāsid to hai kyā chiiz kare qasd jo 'inshā'

tū toḌ de jhaT balġham-e-bā.ūr kī gardan

toDunga KHum-e-baada-e-angur ki gardan

rakh dunga wahan kaT ke ek hur ki gardan

KHuddar ki ban shakl alif hae anal-haq

nit chahti hain ek nai mansur ki gardan

kyun saqi-e-KHurshid-e-jabin kya hai nasha hun

sab yunhi chaDha jaun mai-e-nur ki gardan

uchhli hui warzish se tari DanD pe machhli

hai nam-e-KHuda jaisi saqanqur ki gardan

tha shaKHs jo gardan-zadani us se ye bole

ab dijiye hai deni jo manzur ki gardan

aaine ki gar sair kare shaiKH ye dekhe

sar KHurs ka munh KHuk ka langur ki gardan

yun panja-e-mizhgan mein paDa hai ye mara dil

jun changul-e-shahbaz mein usfur ki gardan

tab aalam-e-masti ka maza hai ki paDi ho

gardan pe meri us but-e-maKHmur ki gardan

baiTha ho jahan pas sulaiman ke aasif

wan kyun na jhuki qaisar o faghfur ki gardan

bhenchi hai baghal apni main is zor se jo ishq

to toDne par hai kisi majbur ki gardan

ai mast ye kya qahr hai KHisht-e-sar-e-KHum se

kyun tu ne surahi ki bhala chur ki gardan

mahfil mein tari shama bani mom ki maryam

pighli paDi hai us ki wo kafur ki gardan

ai dew-e-safed-e-sahari kash tu toDe

ek mukke se KHur ke shab-e-dijur ki gardan

jab kushta-e-ulfat ko uThaya to alam se

bas hil gai us qatil-e-maghrur ki gardan

be-saKHta bola ki are hath to Tuk do

Dhalke na mere aashiq-e-maghfur ki gardan

hasid to hai kya chiz kare qasd jo 'insha'

tu toD de jhaT balgham-e-baur ki gardan