tujh bin ai nau-bahaar ke manind

tujh bin ai nau-bahār ke mānind

chaak hai dil anaar ke mānind

pahuñchī shāyad jigar tak ātish-e-'ishq

ashk haiñ sab sharār ke mānind

kū dimāġh us kī rah se uThne kā

baiThe ab ham ġhubār ke mānind

koī nikle kalī to laale kī

is dil-e-dāġh-dār ke mānind

sarv ko dekh ġhash kiyā ham ne

thā chaman meñ vo yaar ke mānind

haar kar shab gale paḌe us ke

ham bhī phūloñ ke haar ke mānind

barq taḌpī bahut vale na huī

is dil-e-be-qarār ke mānind

qaaf

un ne khīñchī thī said-gah meñ teġh

barq-e-abr-e-bahār ke mānind

us ke ghoḌe ke aage se na Tale

ham bhī duble shikār ke mānind

qaaf

zaḳhm khā baiThiyo jigar par mat

tū bhī mujh dil-figār ke mānind

us kī sar-tez har palak hai 'mīr'

ḳhanjar-e-ābdār ke mānind

tujh bin ai nau-bahaar ke manind

chaak hai dil anar ke manind

pahunchi shayad jigar tak aatish-e-'ishq

ashk hain sab sharar ke manind

ku dimagh us ki rah se uThne ka

baiThe ab hum ghubar ke manind

koi nikle kali to lale ki

is dil-e-dagh-dar ke manind

sarw ko dekh ghash kiya hum ne

tha chaman mein wo yar ke manind

haar kar shab gale paDe us ke

hum bhi phulon ke haar ke manind

barq taDpi bahut wale na hui

is dil-e-be-qarar ke manind

qaf

un ne khinchi thi said-gah mein tegh

barq-e-abr-e-bahaar ke manind

us ke ghoDe ke aage se na Tale

hum bhi duble shikar ke manind

qaf

zaKHm kha baiThiyo jigar par mat

tu bhi mujh dil-figar ke manind

us ki sar-tez har palak hai 'mir'

KHanjar-e-abdar ke manind