tujhko ab koi shikayat to nahin

tujh ko ab koī shikāyat to nahīñ

ye magar tark-e-mohabbat to nahīñ

merī āñkhoñ meñ utarne vaale

Duub jaanā tirī 'ādat to nahīñ

tujh se begāne kā ġham hai varna

mujh ko ḳhud apnī zarūrat to nahīñ

khul ke ro luuñ to zarā jī sañbhle

muskurānā hī masarrat to nahīñ

tujh se farhād kā tesha na uThā

is junūñ par mujhe hairat to nahīñ

phir se kah de ki tirī manzil-e-shauq

merā dil hai mirī sūrat to nahīñ

terī pahchān ke lākhoñ andāz

sar jhukānā hī 'ibādat to nahīñ

tujh ko ab koi shikayat to nahin

ye magar tark-e-mohabbat to nahin

meri aankhon mein utarne wale

Dub jaana teri 'adat to nahin

tujh se begane ka gham hai warna

mujh ko KHud apni zarurat to nahin

khul ke ro lun to zara ji sanbhle

muskurana hi masarrat to nahin

tujh se farhad ka tesha na uTha

is junun par mujhe hairat to nahin

phir se kah de ki teri manzil-e-shauq

mera dil hai meri surat to nahin

teri pahchan ke lakhon andaz

sar jhukana hi 'ibaadat to nahin