tujhko ai mehr-e-jahan-tab KHabar hai ki nahin

tujh ko ai mehr-e-jahāñ-tāb ḳhabar hai ki nahīñ

ziist kī shab mirī muhtāj-e-sahar hai ki nahīñ

kis liye ḳhauf tujhe hai mirī hamrāhī meñ

rahbarī meñ mirī mahfūz ḳhizar hai ki nahīñ

tū hī tanhā nahīñ badnām-e-zamāna ai dost

bevafā terī tarah nau-e-bashar hai ki nahīñ

kyoñ karūñ ḳhud pe maiñ pābandī-e-manzil aa.ed

dasht phailā huā tā-hadd-e-nazar hai ki nahīñ

aañkh to tū ne niDar ho ke milā lī thī magar

tab se sharmā.ī huī terī nazar hai ki nahīñ

aql hairān hai aqdār kī tabdīlī par

kal jo thā aib vahī aaj hunar hai ki nahīñ

kyoñ vo hamsā.egī-e-arsh pe nāzāñ na rahe

rif.at-e-dār pe 'mansūr' kā ghar hai ki nahīñ

tujh ko ai mehr-e-jahan-tab KHabar hai ki nahin

zist ki shab meri muhtaj-e-sahar hai ki nahin

kis liye KHauf tujhe hai meri hamrahi mein

rahbari mein meri mahfuz KHizar hai ki nahin

tu hi tanha nahin badnam-e-zamana ai dost

bewafa teri tarah nau-e-bashar hai ki nahin

kyon karun KHud pe main pabandi-e-manzil aaed

dasht phaila hua ta-hadd-e-nazar hai ki nahin

aankh to tu ne niDar ho ke mila li thi magar

tab se sharmai hui teri nazar hai ki nahin

aql hairan hai aqdar ki tabdili par

kal jo tha aib wahi aaj hunar hai ki nahin

kyon wo hamsaegi-e-arsh pe nazan na rahe

rifat-e-dar pe 'mansur' ka ghar hai ki nahin