tujhko chahun meri majal kahan

tujh ko chāhūñ mirī majāl kahāñ

bas meñ lekin mirā ḳhayāl kahāñ

terā milnā muhāl hai lekin

tū jo chāhe to phir muhāl kahāñ

ek lamha karam kā de dete

maiñ ne māñge the māh-o-sāl kahāñ

phir nasheman qafas meñ yaad aayā

maiñ kahāñ aur mirā ḳhayāl kahāñ

mai-kadā jo rah-e-hayāt meñ ho

gumrahī kā phir ehtimāl kahāñ

dil ne mushkil se chain paayā thā

phir se aayā tirā ḳhayāl kahāñ

vo mile bhī to ajnabī kī tarah

pursish-e-hāl kā savāl kahāñ

jalva-e-husn meñ huā huuñ gum

ab yahāñ jā-e-qīl-o-qāl kahāñ

chup hī behtar hai is zamāne meñ

sunñe vaalā hai dil kā haal kahāñ

kyā na dekhā 'habīb' duniyā meñ

yaañ se jaane meñ phir malāl kahāñ

tujh ko chahun meri majal kahan

bas mein lekin mera KHayal kahan

tera milna muhaal hai lekin

tu jo chahe to phir muhaal kahan

ek lamha karam ka de dete

main ne mange the mah-o-sal kahan

phir nasheman qafas mein yaad aaya

main kahan aur mera KHayal kahan

mai-kada jo rah-e-hayat mein ho

gumrahi ka phir ehtimal kahan

dil ne mushkil se chain paya tha

phir se aaya tera KHayal kahan

wo mile bhi to ajnabi ki tarah

pursish-e-haal ka sawal kahan

jalwa-e-husn mein hua hun gum

ab yahan ja-e-qil-o-qal kahan

chup hi behtar hai is zamane mein

sunne wala hai dil ka haal kahan

kya na dekha 'habib' duniya mein

yan se jaane mein phir malal kahan