tujhko hai zauq-e-sakun ai dil-e-betab abhi

tujh ko hai zauq-e-sakūñ ai dil-e-betāb abhī

sub.h hai aur hai tū muntazir-e-ḳhvāb abhī

abhī andesha-e-tārāj-e-ḳhizāñ baaqī hai

vaqt hañsne kā nahīñ ai gul-e-shādāb abhī

fikr-e-tāmīr bhī ġhāfil nahīñ bebas hai magar

ki junūñ-ḳhez haiñ taḳhrīb ke asbāb abhī

jis se duniyā kī jarāhat kā mudāvā ho jaa.e

nosh-dārū vo zamāne meñ hai nāyāb abhī

jis ke har jur.a meñ ho kaif-e-musāvāt nihāñ

mai-kadoñ meñ nahīñ miltī vo mai-e-nāb abhī

qais-o-farhād kī taqlīd pe marne vaale

dasht-o-kohsār meñ haiñ naqsh vo ādāb abhī

faiz-e-qudrat meñ kamī koī nahīñ hai lekin

phir bhī muhtāj hai ye ālam-e-asbāb abhī

mujh se 'mahrūm' taqāzā-e-ġhazal hai be-sūd

ki mirī fikr meñ hai nauha-e-panjāb abhī

tujh ko hai zauq-e-sakun ai dil-e-betab abhi

subh hai aur hai tu muntazir-e-KHwab abhi

abhi andesha-e-taraj-e-KHizan baqi hai

waqt hansne ka nahin ai gul-e-shadab abhi

fikr-e-tamir bhi ghafil nahin bebas hai magar

ki junun-KHez hain taKHrib ke asbab abhi

jis se duniya ki jarahat ka mudawa ho jae

nosh-daru wo zamane mein hai nayab abhi

jis ke har jura mein ho kaif-e-musawat nihan

mai-kadon mein nahin milti wo mai-e-nab abhi

qais-o-farhad ki taqlid pe marne wale

dasht-o-kohsar mein hain naqsh wo aadab abhi

faiz-e-qudrat mein kami koi nahin hai lekin

phir bhi muhtaj hai ye aalam-e-asbab abhi

mujh se 'mahrum' taqaza-e-ghazal hai be-sud

ki meri fikr mein hai nauha-e-panjab abhi