tujhko KHiffat se bacha lun pani

tujh ko ḳhiffat se bachā luuñ paanī

tishnagī apnī chhupā luuñ paanī

ḳhaak uḌtī hai har ik chehre par

kis kī āñkhoñ se nikālūñ paanī

dhuup dariyā pe nazar rakhtī hai

tujh ko kuuze meñ chhupā luuñ paanī

uḌte phirte haiñ saroñ par bādal

ḳhvāb āñkhoñ meñ basā luuñ paanī

roz bachchoñ ko sulā duuñ yūñhī

roz patthar ko ubālūñ paanī

aag se kheltā hai kal mujh ko

aa tujhe apnā banā luuñ paanī

ḳhārzāroñ pe chalūñ nañge paañv

ḳhushk dhartī kī duā luuñ paanī

sabr kī had bhī to kuchh hotī hai

kitnā palkoñ pe sambhālūñ paanī

bhuul jā.ūñ na kahīñ tairākī

kyuuñ na kashtī hī jalā luuñ paanī

apnī vahshat kā ik iz.hār sahī

kar ke sard aag jalā luuñ paanī

zaḳhm ho phuul ho yā añgāra

ho jo raushan to bulā luuñ paanī

shart hai terī rifāqat varna

vaqt kī aag meñ Dālūñ paanī

aag matlūb-e-lab-e-tishna hai

maiñ tujhe kaise bulā luuñ paanī

chashm-e-ahbāb jo ho ḳhushk 'atā'

ḳhuun ko apne banā luuñ paanī

tujh ko KHiffat se bacha lun pani

tishnagi apni chhupa lun pani

KHak uDti hai har ek chehre par

kis ki aankhon se nikalun pani

dhup dariya pe nazar rakhti hai

tujh ko kuze mein chhupa lun pani

uDte phirte hain saron par baadal

KHwab aankhon mein basa lun pani

roz bachchon ko sula dun yunhi

roz patthar ko ubaalun pani

aag se khelta hai kal mujh ko

aa tujhe apna bana lun pani

KHarzaron pe chalun nange panw

KHushk dharti ki dua lun pani

sabr ki had bhi to kuchh hoti hai

kitna palkon pe sambhaalun pani

bhul jaun na kahin tairaki

kyun na kashti hi jala lun pani

apni wahshat ka ek izhaar sahi

kar ke sard aag jala lun pani

zaKHm ho phul ho ya angara

ho jo raushan to bula lun pani

shart hai teri rifaqat warna

waqt ki aag mein Dalun pani

aag matlub-e-lab-e-tishna hai

main tujhe kaise bula lun pani

chashm-e-ahbab jo ho KHushk 'ata'

KHun ko apne bana lun pani