tujhko to quwwat-e-izhaar zamane se mili

tujh ko to quvvat-e-iz.hār zamāne se milī

mujh ko āzāda-ravī ḳhuun jalāne se milī

qarya-e-jāñ kī tarah un pe udāsī thī muhīt

dar-o-dīvār ko raunaq tire aane se milī

yuuñ tasallī ko to ik yaad bhī kaafī thī magar

dil ko taskīn tire lauT ke aane se milī

maiñ ḳhizāñ-dīda shajar kī tarah gumnām sā thā

mujh ko vaq.at tirī tasvīr banāne se milī

shāḳh-e-ehsās pe jo phuul khile haiñ un ko

zindagī husn kā idrāk baḌhāne se milī

jāgtī aañkh se jo ḳhvāb thā dekhā 'anvar'

us kī ta.abīr mujhe dil ke jalāne se milī

tujh ko to quwwat-e-izhaar zamane se mili

mujh ko aazada-rawi KHun jalane se mili

qarya-e-jaan ki tarah un pe udasi thi muhit

dar-o-diwar ko raunaq tere aane se mili

yun tasalli ko to ek yaad bhi kafi thi magar

dil ko taskin tere lauT ke aane se mili

main KHizan-dida shajar ki tarah gumnam sa tha

mujh ko waqat teri taswir banane se mili

shaKH-e-ehsas pe jo phul khile hain un ko

zindagi husn ka idrak baDhane se mili

jagti aankh se jo KHwab tha dekha 'anwar'

us ki tabir mujhe dil ke jalane se mili