tujhko ye ghussa teri taswir aadhi rah gai

tujh ko ye ġhussa tirī tasvīr aadhī rah ga.ī

mujh ko ye ronā mirī taqdīr aadhī rah ga.ī

zindagī kā dūsrā ruḳh raaz ban kar rah gayā

zindagī ke raaz kī tafsīr aadhī rah ga.ī

nāma-e-a.amāl se sābit hue vo bevafā

āshiq-e-nākām kī taqsīr aadhī rah ga.ī

ishq apnā husn pā kar bhī harīf-e-husn hai

ya.anī is iksīr meñ tāsīr aadhī rah ga.ī

ai siyāsat dekh terā koḌh phūTā hai kahāñ

dekh puurī vādī-e-kashmīr aadhī rah ga.ī

jā kaho 'kundan' kanhā.ī se ki tere hijr meñ

rādhikā ro ro ke jamunā-tīr aadhī rah ga.ī

tujh ko ye ghussa teri taswir aadhi rah gai

mujh ko ye rona meri taqdir aadhi rah gai

zindagi ka dusra ruKH raaz ban kar rah gaya

zindagi ke raaz ki tafsir aadhi rah gai

nama-e-amal se sabit hue wo bewafa

aashiq-e-nakaam ki taqsir aadhi rah gai

ishq apna husn pa kar bhi harif-e-husn hai

yani is iksir mein tasir aadhi rah gai

ai siyasat dekh tera koDh phuTa hai kahan

dekh puri wadi-e-kashmir aadhi rah gai

ja kaho 'kundan' kanhai se ki tere hijr mein

radhika ro ro ke jamuna-tir aadhi rah gai