tujh mein kab husn-e-bahaar-e-gul ki ranai na thi

tujh meñ kab husn-e-bahār-e-gul kī ra.anā.ī na thī

kab tire jalvoñ kī ik duniyā tamāshā.ī na thī

zindagī bhar aarzū kā ḳhuun hī hotā rahā

lab pe lekin ek din bhī aah tak aa.ī na thī

ishq hai ik ātish-e-dil-soz meñ jalne kā naam

ham ko to roz-e-azal ye baat samjhā.ī na thī

ham rahe haiñ manziloñ hī manziloñ meñ umr bhar

jaise qismat meñ kisī pahlū shakebā.ī na thī

ik chaman kyā do jahāñ kī āfatoñ se duur thā

ġhuncha-e-nauras ke lab tak jab hañsī aa.ī na thī

kyā kahūñ 'jauhar' jo mere jān-o-dil par ban ga.ī

maut kā paiġhām thā ik shām-e-tanhā.ī na thī

tujh mein kab husn-e-bahaar-e-gul ki ranai na thi

kab tere jalwon ki ek duniya tamashai na thi

zindagi bhar aarzu ka KHun hi hota raha

lab pe lekin ek din bhi aah tak aai na thi

ishq hai ek aatish-e-dil-soz mein jalne ka nam

hum ko to roz-e-azal ye baat samjhai na thi

hum rahe hain manzilon hi manzilon mein umr bhar

jaise qismat mein kisi pahlu shakebai na thi

ek chaman kya do jahan ki aafaton se dur tha

ghuncha-e-nauras ke lab tak jab hansi aai na thi

kya kahun 'jauhar' jo mere jaan-o-dil par ban gai

maut ka paigham tha ek sham-e-tanhai na thi