tujh pe donon nisar hain qatil

tujh pe donoñ nisār haiñ qātil

jān-e-muztar ho yā dil-e-bismil

qahr hai qahr ishq kī manzil

har qadam par hai ik na.ī mushkil

ho ga.e dekh kar vo ā.īna

apnī sūrat pe aap hī maa.il

ġham se āzād kar diyā ham ko

kyoñ na pīr-e-muġhāñ ke hoñ qaa.el

kis qadar dil-kushā fazā hogī

aap jab hoñge zīnat-e-mahfil

ādamiyyat ko naaz thā jin par

ab vo daanā rahe na vo aaqil

chāra-sāzī marīz-e-ulfat kī

aap ke vāste nahīñ mushkil

ārzūoñ meñ mach ga.ī halchal

kaun ye yaad aa gayā ai dil

tū ubhāre jo ham ko pastī se

tujh ko yā-rab nahīñ koī mushkil

haa.e jo baat bhī kahī maiñ ne

zer-e-lab tū ne kah diyā mohmal

kyā bharosa kareñ kisī pe 'naresh'

aadmī aadmī kā hai qātil

tujh pe donon nisar hain qatil

jaan-e-muztar ho ya dil-e-bismil

qahr hai qahr ishq ki manzil

har qadam par hai ek nai mushkil

ho gae dekh kar wo aaina

apni surat pe aap hi mail

gham se aazad kar diya hum ko

kyon na pir-e-mughan ke hon qael

kis qadar dil-kusha faza hogi

aap jab honge zinat-e-mahfil

aadamiyyat ko naz tha jin par

ab wo dana rahe na wo aaqil

chaara-sazi mariz-e-ulfat ki

aap ke waste nahin mushkil

aarzuon mein mach gai halchal

kaun ye yaad aa gaya ai dil

tu ubhaare jo hum ko pasti se

tujh ko ya-rab nahin koi mushkil

hae jo baat bhi kahi main ne

zer-e-lab tu ne kah diya mohmal

kya bharosa karen kisi pe 'naresh'

aadmi aadmi ka hai qatil