tujh pe khul jae ki kya mehr ko shabnam se mila

tujh pe khul jaa.e ki kyā mehr ko shabnam se milā

aañkh ai husn-e-jahāñ-tāb zarā ham se milā

vo masarrat jise kahte haiñ nashāt-e-abadī

us masarrat kā ḳhazāna bhī tire dam se milā

vahdat-e-sūrat-o-ma.anī ko samajh ai vaa.iz

husn-e-yazdāñ kā tasavvur ruḳh-e-ādam se milā

ahl-e-vahshat se ye taz.īn-e-jahāñ kyā hotī

ye salīqa bhī tire gesū-e-barham se milā

ham-nashīñ soz-e-ġham-e-dil kahīñ mahdūd nahīñ

kabhī sholoñ se milā hai kabhī shabnam se milā

laḌkhaḌānā bhī hai takmīl-e-safar kī tamhīd

ham ko manzil kā nishāñ laġhzish-e-paiham se milā

vaz.a-dārī ise kahiye ki haram meñ bhī 'ravish'

ḳhud hī baḌh kar kisī ġhārat-gar-e-ālam se milā

tujh pe khul jae ki kya mehr ko shabnam se mila

aankh ai husn-e-jahan-tab zara hum se mila

wo masarrat jise kahte hain nashat-e-abadi

us masarrat ka KHazana bhi tere dam se mila

wahdat-e-surat-o-mani ko samajh ai waiz

husn-e-yazdan ka tasawwur ruKH-e-adam se mila

ahl-e-wahshat se ye tazin-e-jahan kya hoti

ye saliqa bhi tere gesu-e-barham se mila

ham-nashin soz-e-gham-e-dil kahin mahdud nahin

kabhi sholon se mila hai kabhi shabnam se mila

laDkhaDana bhi hai takmil-e-safar ki tamhid

hum ko manzil ka nishan laghzish-e-paiham se mila

waza-dari ise kahiye ki haram mein bhi 'rawish'

KHud hi baDh kar kisi ghaarat-gar-e-alam se mila