tujhse ai zist hamein jitne hasin KHwab mile

tujh se ai ziist hameñ jitne hasīñ ḳhvāb mile

naqsh-bar-āb kabhī sūrat-e-sīmāb mile

ham ne har mauj-e-havādis ko kinārā samjhā

ham ko har mauj meñ lipTe hue girdāb mile

gardish-e-vaqt ne gahnā diye kitne sūraj

sub.h kī god meñ dam toḌte mahtāb mile

jab bhī sadiyoñ kī futūhāt ko muḌ kar dekhā

ḳhuuñ meñ lithḌe hue tārīḳh ke abvāb mile

sail-e-zulmāt meñ hai qāfila-e-manzil-e-shab

kaash aise meñ koī najm-e-ufuq-tāb mile

ahl-e-kirdār ko dekhā hai sar-e-dār aksar

ahl-e-guftār tah-e-sāya-e-mehrāb mile

fasl-e-gul aa.ī hai yaaro to ġhanīmat jaano

phuul afsurda sahī zaḳhm to shādāb mile

dil ke har daaġh se vābasta hai rūdād-e-sitam

rañj baḌhtā gayā juuñ juuñ mujhe ahbāb mile

mujh ko 'aḳhtar' na milī nāla-e-shab-gīr kī daad

qarya-e-shauq ke sab log garāñ-ḳhvāb mile

tujh se ai zist hamein jitne hasin KHwab mile

naqsh-bar-ab kabhi surat-e-simab mile

hum ne har mauj-e-hawadis ko kinara samjha

hum ko har mauj mein lipTe hue girdab mile

gardish-e-waqt ne gahna diye kitne suraj

subh ki god mein dam toDte mahtab mile

jab bhi sadiyon ki futuhat ko muD kar dekha

KHun mein lithDe hue tariKH ke abwab mile

sail-e-zulmat mein hai qafila-e-manzil-e-shab

kash aise mein koi najm-e-ufuq-tab mile

ahl-e-kirdar ko dekha hai sar-e-dar aksar

ahl-e-guftar tah-e-saya-e-mehrab mile

fasl-e-gul aai hai yaro to ghanimat jaano

phul afsurda sahi zaKHm to shadab mile

dil ke har dagh se wabasta hai rudad-e-sitam

ranj baDhta gaya jun jun mujhe ahbab mile

mujh ko 'aKHtar' na mili nala-e-shab-gir ki dad

qarya-e-shauq ke sab log garan-KHwab mile