tujhse baDh kar koi pyara bhi nahin ho sakta

tujh se baḌh kar koī pyārā bhī nahīñ ho saktā

par tirā saath gavārā bhī nahīñ ho saktā

paañv rakhte haiñ phisal saktā hai miTTī ho ki ret

har kinārā to kinārā bhī nahīñ ho saktā

us tak āvāz pahuñchnī bhī baḌī mushkil hai

aur na dekhe to ishāra bhī nahīñ ho saktā

tere bandoñ kī ma.īshat kā ajab haal huā

aish kaisā ki guzārā bhī nahīñ ho saktā

apnā dushman bhī dikhā.ī nahīñ detā ho jise

aisā lashkar to saf-ārā bhī nahīñ ho saktā

husn aisā ki chakā-chauñd huī haiñ āñkheñ

hairat aisī ki nazārā bhī nahīñ haiñ āñkheñ

vaise vo shaḳhs hamārā to kabhī thā hī nahīñ

dukh to ye hai ki tumhārā bhī nahīñ ho saktā

duniyā achchhī bhī nahīñ lagtī ham aisoñ ko 'salīm'

aur duniyā se kinārā bhī nahīñ ho saktā

tujh se baDh kar koi pyara bhi nahin ho sakta

par tera sath gawara bhi nahin ho sakta

panw rakhte hain phisal sakta hai miTTi ho ki ret

har kinara to kinara bhi nahin ho sakta

us tak aawaz pahunchni bhi baDi mushkil hai

aur na dekhe to ishaara bhi nahin ho sakta

tere bandon ki maishat ka ajab haal hua

aish kaisa ki guzara bhi nahin ho sakta

apna dushman bhi dikhai nahin deta ho jise

aisa lashkar to saf-ara bhi nahin ho sakta

husn aisa ki chaka-chaund hui hain aankhen

hairat aisi ki nazara bhi nahin hain aankhen

waise wo shaKHs hamara to kabhi tha hi nahin

dukh to ye hai ki tumhaara bhi nahin ho sakta

duniya achchhi bhi nahin lagti hum aison ko 'salim'

aur duniya se kinara bhi nahin ho sakta