tujhse bichhaD kar kya hun main ab bahar aa kar dekh

tujh se bichhaḌ kar kyā huuñ maiñ ab bāhar aa kar dekh

himmat hai to merī hālat aañkh milā kar dekh

shaam hai gahrī tez havā hai sar pe khaḌī hai raat

rasta ga.e musāfir kā ab diyā jalā kar dekh

darvāze ke paas aa aa kar vāpas muḌtī chaap

kaun hai is sunsān galī meñ paas bulā kar dekh

shāyad koī dekhne vaalā ho jaa.e hairān

kamre kī dīvāroñ par koī naqsh banā kar dekh

tū bhī 'munīr' ab bhare jahāñ meñ mil kar rahnā siikh

bāhar se to dekh liyā ab andar jā kar dekh

tujh se bichhaD kar kya hun main ab bahar aa kar dekh

himmat hai to meri haalat aankh mila kar dekh

sham hai gahri tez hawa hai sar pe khaDi hai raat

rasta gae musafir ka ab diya jala kar dekh

darwaze ke pas aa aa kar wapas muDti chap

kaun hai is sunsan gali mein pas bula kar dekh

shayad koi dekhne wala ho jae hairan

kamre ki diwaron par koi naqsh bana kar dekh

tu bhi 'munir' ab bhare jahan mein mil kar rahna sikh

bahar se to dekh liya ab andar ja kar dekh