tujhse mansub rahun teri kahi jaun piya

tujh se mansūb rahūñ terī kahī jā.ūñ piyā

tirī nisbat se likhī aur paḌhī jā.ūñ piyā

jhūmtī phirtī havāoñ kī tarah se maiñ bhī

chuum kar lams tirā mast huī jā.ūñ piyā

tire ehsās se lipTī rahūñ ḳhushbū kī tarah

raat kī raanī banūñ aur khulī jā.ūñ piyā

tirī aahaT kā samā.at meñ koī dar jo khule

maiñ usī dar meñ diyā ban ke jalī jā.ūñ piyā

Daal duuñ āb-e-sitamgar meñ kahīñ kachchā ghaḌā

dar-e-kisrā meñ kahīñ zinda chunī jā.ūñ piyā

raat ke pichhle pahar vajd ke aalam meñ kahīñ

maiñ tirī ruuh meñ tahlīl huī jā.ūñ piyā

phir tire ishq meñ ḳhushbū kā badan pahne hue

tirī chaukhaT pe agar ban ke jalī jā.ūñ piyā

jab kahīñ koī faqīroñ meñ kare zikr mirā

maiñ tire dar ke faqīroñ meñ ginī jā.ūñ piyā

mire hujre meñ tirī chaap ke jab phuul khileñ

aap hī aap charāġhoñ meñ Dhalī jā.ūñ piyā

ho agar dafn mire saath tirā naqsh-e-qadam

raqs kartī sū-e-maqtal ba-ḳhushī jā.ūñ piyā

ban ke dargāhoñ pe maiñ hijr ke māroñ kī duā

dard ke champa.ī dhāgoñ meñ bañdhī jā.ūñ piyā

jab tire naqsh-e-qadam par maiñ jhukī jā.ūñ piyā

āsmānoñ meñ uḌuuñ uḌtī chalī jā.ūñ piyā

dekh le is meñ sarāsar tirī badnāmī hai

ki tire dar se uThūñ aur tahī jā.ūñ piyā

tujh se mansub rahun teri kahi jaun piya

teri nisbat se likhi aur paDhi jaun piya

jhumti phirti hawaon ki tarah se main bhi

chum kar lams tera mast hui jaun piya

tere ehsas se lipTi rahun KHushbu ki tarah

raat ki rani banun aur khuli jaun piya

teri aahaT ka samaat mein koi dar jo khule

main usi dar mein diya ban ke jali jaun piya

Dal dun aab-e-sitamgar mein kahin kachcha ghaDa

dar-e-kisra mein kahin zinda chuni jaun piya

raat ke pichhle pahar wajd ke aalam mein kahin

main teri ruh mein tahlil hui jaun piya

phir tere ishq mein KHushbu ka badan pahne hue

teri chaukhaT pe agar ban ke jali jaun piya

jab kahin koi faqiron mein kare zikr mera

main tere dar ke faqiron mein gini jaun piya

mere hujre mein teri chap ke jab phul khilen

aap hi aap charaghon mein Dhali jaun piya

ho agar dafn mere sath tera naqsh-e-qadam

raqs karti su-e-maqtal ba-KHushi jaun piya

ban ke dargahon pe main hijr ke maron ki dua

dard ke champai dhagon mein bandhi jaun piya

jab tere naqsh-e-qadam par main jhuki jaun piya

aasmanon mein uDun uDti chali jaun piya

dekh le is mein sarasar teri badnami hai

ki tere dar se uThun aur tahi jaun piya