tujhse mil kar dil mein rah jati hai armanon ki baat

tujh se mil kar dil meñ rah jaatī hai armānoñ kī baat

yaad rahtī hai kisī sāhil pe tūfānoñ kī baat

vo to kahiye aaj bhī zanjīr meñ jhankār hai

varna kis ko yaad rah jaatī hai dīvānoñ kī baat

kyā na thī tum ko ḳhabar ai kaj-kalāhān-e-bahār

bū-e-gul ke saath hī phailegī zindānoñ kī baat

ḳhair ho mere junūñ kī khil ga.e sad.hā gulāb

varna koī pūchhtā hī kyā bayābānoñ kī baat

kyā kabhī hotī kisī kī tū magar ai zindagī

zahr pī kar ham ne rakh lī tere dīvānoñ kī baat

rishta-e-yād-e-butāñ TuuTā na tark-e-ishq se

hai haram meñ ab bhī zer-e-lab sanam-ḳhānoñ kī baat

ham-nashīñ us ke lab o ruḳhsār hoñ yā sair-e-gul

tazkira koī bhī ho niklegī mai-ḳhānoñ kī baat

bazm-e-anjum ho ki bazm-e-ḳhāk yā bazm-e-ḳhayāl

jis jagah jaao sunā.ī degī insānoñ kī baat

ibn-e-ādam ḳhosha-e-gandum pe hai mā.il-ba-jañg

ye na hai masjid kā qissa aur na but-ḳhānoñ kī baat

phuul se bhī narm-tar 'vāmiq' kabhī apnā kalām

aur kabhī talvār ham āshufta-sāmānoñ kī baat

tujh se mil kar dil mein rah jati hai armanon ki baat

yaad rahti hai kisi sahil pe tufanon ki baat

wo to kahiye aaj bhi zanjir mein jhankar hai

warna kis ko yaad rah jati hai diwanon ki baat

kya na thi tum ko KHabar ai kaj-kalahan-e-bahaar

bu-e-gul ke sath hi phailegi zindanon ki baat

KHair ho mere junun ki khil gae sadha gulab

warna koi puchhta hi kya bayabanon ki baat

kya kabhi hoti kisi ki tu magar ai zindagi

zahr pi kar hum ne rakh li tere diwanon ki baat

rishta-e-yaad-e-butan TuTa na tark-e-ishq se

hai haram mein ab bhi zer-e-lab sanam-KHanon ki baat

ham-nashin us ke lab o ruKHsar hon ya sair-e-gul

tazkira koi bhi ho niklegi mai-KHanon ki baat

bazm-e-anjum ho ki bazm-e-KHak ya bazm-e-KHayal

jis jagah jao sunai degi insanon ki baat

ibn-e-adam KHosha-e-gandum pe hai mail-ba-jang

ye na hai masjid ka qissa aur na but-KHanon ki baat

phul se bhi narm-tar 'wamiq' kabhi apna kalam

aur kabhi talwar hum aashufta-samanon ki baat