tujhse rah rah kar mujhe aati hai kya kya bu-e-dost

tujh se rah rah kar mujhe aatī hai kyā kyā bū-e-dost

dil huā jaatā hai muztar ai havā-e-kū-e-dost

aadmī hī kuchh nahīñ mahv-e-qad-e-dil-jū-e-dost

dekh kar hairān haiñ jinn-o-malak bhī rū-e-dost

apne dil meñ ḳhush na ho kyoñ dekh kar vo sū-e-dost

hai hilāl-e-īd āshiq ko ḳham-e-abrū-e-dost

chhūTnā dushvār ho jaatā hai dām-e-ishq se

phāñs letā hai galā kuchh is tarah gesū-e-dost

vā.izo ham kyā kareñge le ke firdaus-e-barīñ

bāġh-e-jannat se kahīñ behtar hameñ hai kū-e-dost

ḳhair apnī jaan kī ham ko nazar aatī nahīñ

teġh-e-dushman se hai baḌh kar ḳhanjar-e-abrū-e-dost

ḳhaak mil jaatī jo apnī us ke dar kī ḳhaak se

hai kahāñ aisā muqaddar ai nasīm-e-kū-e-dost

jazb-e-ulfat se nahīñ kuchh kam kashish bhī husn kī

baiThe baiThe dil khichā jaatā hai 'hāmid' sū-e-dost

tujh se rah rah kar mujhe aati hai kya kya bu-e-dost

dil hua jata hai muztar ai hawa-e-ku-e-dost

aadmi hi kuchh nahin mahw-e-qad-e-dil-ju-e-dost

dekh kar hairan hain jinn-o-malak bhi ru-e-dost

apne dil mein KHush na ho kyon dekh kar wo su-e-dost

hai hilal-e-id aashiq ko KHam-e-abru-e-dost

chhuTna dushwar ho jata hai dam-e-ishq se

phans leta hai gala kuchh is tarah gesu-e-dost

waizo hum kya karenge le ke firdaus-e-barin

bagh-e-jannat se kahin behtar hamein hai ku-e-dost

KHair apni jaan ki hum ko nazar aati nahin

tegh-e-dushman se hai baDh kar KHanjar-e-abru-e-dost

KHak mil jati jo apni us ke dar ki KHak se

hai kahan aisa muqaddar ai nasim-e-ku-e-dost

jazb-e-ulfat se nahin kuchh kam kashish bhi husn ki

baiThe baiThe dil khicha jata hai 'hamid' su-e-dost