tujhse talluqat ki tajdid ke liye

tujh se ta.alluqāt kī tajdīd ke liye

maiñ ne charāġh haath meñ ummīd ke liye

phailī hai mere dil meñ tire dil kī raushnī

lamhāt-e-fikriya haiñ ye ḳhurshīd ke liye

ik sher tujh pe is tarah likkhūñ ki jis tarah

momin kā sher ġhairat-e-nāhīd ke liye

chheḌā hai ek naġhma-e-shīrīñ bhī kū-ba-kū

dil ne hilāl-e-īd kī tā.īd ke liye

sū-e-falak nazar jo uThī to vuzū kiyā

merī zabāñ ne kalma-e-tauhīd ke liye

mere laboñ ne aaj qasīde bahut paḌhe

apne ḳhudā-e-pāk kī tamjīd ke liye

uTheñge aaj merī taraf jab tire qadam

koī ḳhabar na aa.egī tardīd ke liye

dekhūñ tujhe to dāman-e-tausīf kah uThe

ik harf bhī mile nahīñ tanqīd ke liye

maiñ sochtī huuñ dasht-e-tamannā meñ aaj shab

āñkheñ taras na jaa.eñ tirī diid ke liye

lekin mujhe yaqīñ hai tire āsmān par

utregī chāñd raat mirī iid ke liye

tujh se talluqat ki tajdid ke liye

main ne charagh hath mein ummid ke liye

phaili hai mere dil mein tere dil ki raushni

lamhat-e-fikriya hain ye KHurshid ke liye

ek sher tujh pe is tarah likkhun ki jis tarah

momin ka sher ghairat-e-nahid ke liye

chheDa hai ek naghma-e-shirin bhi ku-ba-ku

dil ne hilal-e-id ki taid ke liye

su-e-falak nazar jo uThi to wuzu kiya

meri zaban ne kalma-e-tauhid ke liye

mere labon ne aaj qaside bahut paDhe

apne KHuda-e-pak ki tamjid ke liye

uThenge aaj meri taraf jab tere qadam

koi KHabar na aaegi tardid ke liye

dekhun tujhe to daman-e-tausif kah uThe

ek harf bhi mile nahin tanqid ke liye

main sochti hun dasht-e-tamanna mein aaj shab

aankhen taras na jaen teri did ke liye

lekin mujhe yaqin hai tere aasman par

utregi chand raat meri id ke liye