tujhse tasawwuraat mein ai jaan-e-arzu

tujh se tasavvurāt meñ ai jān-e-ārzū

bāñdhe haiñ ham ne saiñkaḌoñ paimān-e-ārzū

ai rashk-e-nau-bahār tire intizār meñ

kyā kyā khilā.e ham ne gulistān-e-ārzū

phir dil meñ dāġh-hā-e-tamannā haiñ zau-fishāñ

phir kar rahā huuñ jashn-e-charāġhān-e-ārzū

dekhe koī ye rabt ki marne ke ba.ad bhī

chhūTā na dast-e-shauq se dāmān-e-ārzū

ab dekhiye guzartī hai kyā us kī jaan par

ik dil hai aur saiñkaḌoñ tūfān-e-ārzū

terā ḳhayāl tere nazāre tirā jamāl

kitne charāġh haiñ tah-dāmān-e-ārzū

samjho na ham ko be-sar-o-sāmāñ ki ham 'jalīs'

rakhte haiñ dil meñ ganj-e-farāvān-e-ārzū

tujh se tasawwuraat mein ai jaan-e-arzu

bandhe hain hum ne sainkaDon paiman-e-arzu

ai rashk-e-nau-bahaar tere intizar mein

kya kya khilae hum ne gulistan-e-arzu

phir dil mein dagh-ha-e-tamanna hain zau-fishan

phir kar raha hun jashn-e-charaghan-e-arzu

dekhe koi ye rabt ki marne ke baad bhi

chhuTa na dast-e-shauq se daman-e-arzu

ab dekhiye guzarti hai kya us ki jaan par

ek dil hai aur sainkaDon tufan-e-arzu

tera KHayal tere nazare tera jamal

kitne charagh hain tah-daman-e-arzu

samjho na hum ko be-sar-o-saman ki hum 'jalis'

rakhte hain dil mein ganj-e-farawan-e-arzu