tujh zulf ki shikan hai manind-e-dam goya

tujh zulf kī shikan hai mānind-e-dām goyā

yā sub.h par hamārī aa.ī hai shaam goyā

haiñ saad us kī āñkheñ aur qad alif ke mānind

abrū hai nūn-e-nādir gesū hai laam goyā

masjid meñ tujh bhavoñ kī ai qibla-e-dil-o-jāñ

palkeñ haiñ muqtadī aur putlī imaam goyā

rañgīñ bahār-e-jannat dozaḳh hai mujh ko us bin

dozaḳh hai us ke hote darussalām goyā

Tuk māh-e-nau kī jānib ai māh-rū nazar kar

ḳham ho tirī bhavoñ kuuñ kartā salām goyā

gul-rū ke qad muqābil ho bā-adab khaḌā hai

shamshād hai chaman meñ us kā ġhulām goyā

sher-e-'sirāj' az-bas aalam meñ haiñ zabāñzad

dīvān kī zamīñ hai dīvān-e-ām goyā

tujh zulf ki shikan hai manind-e-dam goya

ya subh par hamari aai hai sham goya

hain sad us ki aankhen aur qad alif ke manind

abru hai nun-e-nadir gesu hai lam goya

masjid mein tujh bhawon ki ai qibla-e-dil-o-jaan

palken hain muqtadi aur putli imam goya

rangin bahaar-e-jannat dozaKH hai mujh ko us bin

dozaKH hai us ke hote darussalam goya

Tuk mah-e-nau ki jaanib ai mah-ru nazar kar

KHam ho teri bhawon kun karta salam goya

gul-ru ke qad muqabil ho ba-adab khaDa hai

shamshad hai chaman mein us ka ghulam goya

sher-e-'siraj' az-bas aalam mein hain zabanzad

diwan ki zamin hai diwan-e-am goya