tujhe hai pyar to yun karke chal dikha mujhko

tujhe hai pyaar to yuuñ karke chal dikhā mujh ko

sabhī ke sāmne apne gale lagā mujh ko

maiñ jāntā huuñ ki tū ik dahaktā sho.ala hai

tirī tapish meñ agar dam hai to jalā mujh ko

har ik nazar ko patā hai maiñ ek patthar huuñ

har ek dil ne banā rakhā hai ḳhudā mujh ko

tirī zabāñ pe hai inkār aaj bhī lekin

kuchh aur kahtī lagī hai tirī adā mujh ko

na ab rahā hai koī shauq banñe Thanne kā

na apnī or bulātā hai ā.īna mujh ko

kahīñ nadī kahīñ dariyā kahīñ samundar huuñ

ye naam detā hai paanī kā silsila mujh ko

unheñ hai shauq agar āzmāne kā 'ulfat'

ġhurūr apnī vafā par bhī hai baḌā mujh ko

tujhe hai pyar to yun karke chal dikha mujh ko

sabhi ke samne apne gale laga mujh ko

main jaanta hun ki tu ek dahakta shoala hai

teri tapish mein agar dam hai to jala mujh ko

har ek nazar ko pata hai main ek patthar hun

har ek dil ne bana rakha hai KHuda mujh ko

teri zaban pe hai inkar aaj bhi lekin

kuchh aur kahti lagi hai teri ada mujh ko

na ab raha hai koi shauq banne Thanne ka

na apni or bulata hai aaina mujh ko

kahin nadi kahin dariya kahin samundar hun

ye nam deta hai pani ka silsila mujh ko

unhen hai shauq agar aazmane ka 'ulfat'

ghurur apni wafa par bhi hai baDa mujh ko