tujhe pā ke tujh se judā ho ga.e ham
kahāñ kho diyā tū ne kyā ho ga.e ham
mohabbat meñ ik sānehā ho ga.e ham
abhī the abhī jaane kyā ho ga.e ham
mohabbat to ḳhud husn hai husn kaisā
ye kis vahm meñ mubtalā ho ga.e ham
ye kyā kar diyā inqilāb-e-mohabbat
zarā ā.īna lā ye kyā ho ga.e ham
haqīqat meñ banda bhī banñā na aayā
samajhte haiñ dil meñ ḳhudā ho ga.e ham
qayāmat thā tujh se nigāhoñ kā milnā
zamāne se nā-āshnā ho ga.e ham
na raas aa.iiñ āḳhir hameñ ThanDī sāñseñ
ajab saaz the be-sadā ho ga.e ham
tasavvur meñ bal paḌ ga.e abrūoñ par
ye kis bevafā se ḳhafā ho ga.e ham
gudāz-e-mohabbat hameñ dil banā de
bas ek aañch aur aabla ho ga.e ham
kabhī bazm-e-hastī kī raunaq hamīñ the
'sirāj' ab bujhā sā diyā ho ga.e ham
tujhe pa ke tujh se juda ho gae hum
kahan kho diya tu ne kya ho gae hum
mohabbat mein ek saneha ho gae hum
abhi the abhi jaane kya ho gae hum
mohabbat to KHud husn hai husn kaisa
ye kis wahm mein mubtala ho gae hum
ye kya kar diya inqilab-e-mohabbat
zara aaina la ye kya ho gae hum
haqiqat mein banda bhi banna na aaya
samajhte hain dil mein KHuda ho gae hum
qayamat tha tujh se nigahon ka milna
zamane se na-ashna ho gae hum
na ras aain aaKHir hamein ThanDi sansen
ajab saz the be-sada ho gae hum
tasawwur mein bal paD gae abruon par
ye kis bewafa se KHafa ho gae hum
gudaz-e-mohabbat hamein dil bana de
bas ek aanch aur aabla ho gae hum
kabhi bazm-e-hasti ki raunaq hamin the
'siraj' ab bujha sa diya ho gae hum
Source:
Shola-e-Aawaz (Pg. e-67 p-66)
-
Author:
Siraj Lakhnavi
-
- Edition: 1920
- Publisher: Nizami Press, Lucknow
- Year of Publication: 1920
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.