tujhe yaad kar ke bhulane se pahle

tujhe yaad kar ke bhulāne se pahle

maiñ royā bahut muskurāne se pahle

ki ro-ro ke sonā to hañs-hañs ke uThnā

ham aise na the dil lagāne se pahle

mire ḳhvāb rah jaa.eñ na phir adhūre

jabīñ chuum lenā jagāne se pahle

tum apnī tabāhī kā mātam to kar lo

mire haal pe muskurāne se pahle

bahut yaad aa.egī pāgal sī laḌkī

ye sochā nahīñ thā bhulāne se pahle

maiñ TuuTā maiñ bikhrā huā reza-reza

mirī jaañ tire ḳhat jalāne se pahle

tumheñ sirf ranj-o-alam hī mileñge

zarā soch lo dil lagāne se pahle

ġhazal pesh-e-ḳhidmat hai 'rāhī' kī sun lo

kahā us ne sab ko sunāne se pahle

tujhe yaad kar ke bhulane se pahle

main roya bahut muskurane se pahle

ki ro-ro ke sona to hans-hans ke uThna

hum aise na the dil lagane se pahle

mere KHwab rah jaen na phir adhure

jabin chum lena jagane se pahle

tum apni tabahi ka matam to kar lo

mere haal pe muskurane se pahle

bahut yaad aaegi pagal si laDki

ye socha nahin tha bhulane se pahle

main TuTa main bikhra hua reza-reza

meri jaan tere KHat jalane se pahle

tumhein sirf ranj-o-alam hi milenge

zara soch lo dil lagane se pahle

ghazal pesh-e-KHidmat hai 'rahi' ki sun lo

kaha us ne sab ko sunane se pahle