Tuk ek ai nasim sambhaal le ki bahaar mast-e-sharab hai

Tuk ik ai nasīm sambhāl le ki bahār mast-e-sharāb hai

vo jo husn-e-ālam-e-nashsha hai use ab kī ain-shabāb hai

vo ghaTā.eñ chhā.īñ jo kāliyāñ jo harī-bharī huiiñ Dāliyāñ

ubhar aa.iiñ phūloñ kī lāliyāñ to bajā.e āb-e-shahāb hai

ye do-roza nashv-o-numā ko tū na samajh ki naqsh-e-pur-āb se

ye sarāb hai ye habāb hai faqat ek qissa-e-ḳhvāb hai

araq-e-bahār-e-sharāb hai vo hī aaj chhiḌkeñge aap par

na to bed-e-mushk hai is ghaḌī na to kevḌā na gulāb hai

unheñ kahne sunñe se bair hai jo ḳhud aa.eñ so to ba-ḳhair hai

ye ġharaz ki zor hī sair hai na savāl hai na javāb hai

kidhar aa.uuñ jā.ūñ karūñ so kyā mirā jī hī naak meñ aa gayā

na to arz-e-hāl kī taab hai na to sabr-e-ḳhāna-ḳharāb hai

mujhe vahsh-o-tair se rashk hai ki kabhī unhoñ ko kisī namat

na savāl hai na javāb hai na azaab hai na iqaab hai

mirī baat maan sunā dilā na to arz o farz pe jī chalā

koī un ko Toke so kyā bhalā ki vo aalī un kī janāb hai

are 'inshā' ab jo ye daur hai tirī vaz.a in dinoñ aur hai

ye bhī koī ziist kā taur hai na sharāb hai na kabāb hai

Tuk ek ai nasim sambhaal le ki bahaar mast-e-sharab hai

wo jo husn-e-alam-e-nashsha hai use ab ki ain-shabab hai

wo ghaTaen chhain jo kaliyan jo hari-bhari huin Daliyan

ubhar aain phulon ki laliyan to bajae aab-e-shahab hai

ye do-roza nashw-o-numa ko tu na samajh ki naqsh-e-pur-ab se

ye sarab hai ye habab hai faqat ek qissa-e-KHwab hai

araq-e-bahaar-e-sharab hai wo hi aaj chhiDkenge aap par

na to bed-e-mushk hai is ghaDi na to kewDa na gulab hai

unhen kahne sunne se bair hai jo KHud aaen so to ba-KHair hai

ye gharaz ki zor hi sair hai na sawal hai na jawab hai

kidhar aaun jaun karun so kya mera ji hi nak mein aa gaya

na to arz-e-haal ki tab hai na to sabr-e-KHana-KHarab hai

mujhe wahsh-o-tair se rashk hai ki kabhi unhon ko kisi namat

na sawal hai na jawab hai na azab hai na iqab hai

meri baat man suna dila na to arz o farz pe ji chala

koi un ko Toke so kya bhala ki wo aali un ki janab hai

are 'insha' ab jo ye daur hai teri waza in dinon aur hai

ye bhi koi zist ka taur hai na sharab hai na kabab hai