tulu-e-subh-e-safar ki ghaDi thi yaad aaya

tulū-e-sub.h-e-safar kī ghaḌī thī yaad aayā

judā.ī rāsta roke khaḌī thī yaad aayā

kisī kī ḳhanda-labī se bhī khul nahīñ paa.ī

girah to ab ke diloñ meñ paḌī thī yaad aayā

ye dil ke zaḳhm usī jañg meñ atā hue haiñ

jo tere naam pe ḳhud se laḌī thī yaad aayā

jo merā vaqt mire haath aa nahīñ rahā thā

mirī kalā.ī pe terī ghaḌī thī yaad aayā

gale mile the bichhaḌte samay jab āḳhirī baar

vo shaam donoñ pe kitnī kaḌī thī yaad aayā

rageñ badan kī yūñhī to nahīñ khiñchī huī thiiñ

koī salīb sī dil meñ gaḌī thī yaad aayā

huī hai sarf na jaane kahāñ kahāñ ai 'na.īm'

durūn-e-chashm namī to baḌī thī yaad aayā

tulu-e-subh-e-safar ki ghaDi thi yaad aaya

judai rasta roke khaDi thi yaad aaya

kisi ki KHanda-labi se bhi khul nahin pai

girah to ab ke dilon mein paDi thi yaad aaya

ye dil ke zaKHm usi jang mein ata hue hain

jo tere nam pe KHud se laDi thi yaad aaya

jo mera waqt mere hath aa nahin raha tha

meri kalai pe teri ghaDi thi yaad aaya

gale mile the bichhaDte samay jab aaKHiri bar

wo sham donon pe kitni kaDi thi yaad aaya

ragen badan ki yunhi to nahin khinchi hui thin

koi salib si dil mein gaDi thi yaad aaya

hui hai sarf na jaane kahan kahan ai 'naim'

durun-e-chashm nami to baDi thi yaad aaya