tum achchhe masiha ho dawa kyon nahin dete

tum achchhe masīhā ho davā kyoñ nahīñ dete

be-nūr jo hai sham' bujhā kyoñ nahīñ dete

be-nām huuñ be-nang huuñ zāhir to hai tum par

gar rabt nahīñ dil se bhulā kyoñ nahīñ dete

ḳhushbū kī tarah phuul kī uThūñgā chaman se

tum phuul ko zulfoñ se girā kyoñ nahīñ dete

pahuñchūñgā kashākash meñ jahāñ tum ne bulāyā

tum hashr ke maidāñ se sadā kyoñ nahīñ dete

mahfil meñ agar raunaq-e-mahfil hai koī aur

ye baat bhī mahfil ko batā kyoñ nahīñ dete

ik buuñd sī larzāñ hai sar-e-chashm-e-tamannā

nāyāb nahīñ aab girā kyoñ nahīñ dete

nā-karda gunāhoñ kī sazā maut milī hai

phir karda gunāhoñ kī sazā kyoñ nahīñ dete

zaḳhmoñ ko mire dil pe agar dekh liyā hai

dāman se vafāoñ kī havā kyoñ nahīñ dete

dekhā thā kabhī ham ne mohabbat kā janāza

baaqī hai agar kuchh to dikhā kyoñ nahīñ dete

har lamha hamārā hī fasāna hai zabāñ par

ham kuchh bhī nahīñ haiñ to bhulā kyoñ nahīñ dete

kar leñge har ik manzil-e-dushvār ko sar ham

ik jaam mohabbat kā pilā kyoñ nahīñ dete

tum achchhe masiha ho dawa kyon nahin dete

be-nur jo hai sham' bujha kyon nahin dete

be-nam hun be-nang hun zahir to hai tum par

gar rabt nahin dil se bhula kyon nahin dete

KHushbu ki tarah phul ki uThunga chaman se

tum phul ko zulfon se gira kyon nahin dete

pahunchunga kashakash mein jahan tum ne bulaya

tum hashr ke maidan se sada kyon nahin dete

mahfil mein agar raunaq-e-mahfil hai koi aur

ye baat bhi mahfil ko bata kyon nahin dete

ek bund si larzan hai sar-e-chashm-e-tamanna

nayab nahin aab gira kyon nahin dete

na-karda gunahon ki saza maut mili hai

phir karda gunahon ki saza kyon nahin dete

zaKHmon ko mere dil pe agar dekh liya hai

daman se wafaon ki hawa kyon nahin dete

dekha tha kabhi hum ne mohabbat ka janaza

baqi hai agar kuchh to dikha kyon nahin dete

har lamha hamara hi fasana hai zaban par

hum kuchh bhi nahin hain to bhula kyon nahin dete

kar lenge har ek manzil-e-dushwar ko sar hum

ek jam mohabbat ka pila kyon nahin dete