tum apne husn pe ghazlen paDha karo baiThe

tum apne husn pe ġhazleñ paḌhā karo baiThe

ki likhne vaale to muddat se hosh kho baiThe

taras ga.ī haiñ nigāheñ ziyāda kyā kahiye

sanam sanam rahe behtar ḳhudā na ho baiThe

ḳhudā ke fazl se ta.alīm vo huī hai aam

ḳhirad to ḳhair junūñ se bhī haath dho baiThe

burā kiyā ki talātum meñ nā-ḳhudā.ī kī

kināra bhī na milā naav bhī Dubo baiThe

marīz-e-ishq kā jaldī janāza niklegā

kuchh aur der patā pūchhte raho baiThe

tamām shahr meñ bāñTī hai dard kī ḳhairāt

ham us kī diin ko dil meñ nahīñ samo baiThe

tumhārī bazm bahut tañg aur dasht vasī.a

chale to aa.e ghaḌī-do-ghaḌī hī go baiThe

bujhī na ātish-e-dil hī kisī tarah 'rāhīl'

vagarna yaar to āñkheñ bahut bhigo baiThe

tum apne husn pe ghazlen paDha karo baiThe

ki likhne wale to muddat se hosh kho baiThe

taras gai hain nigahen ziyaada kya kahiye

sanam sanam rahe behtar KHuda na ho baiThe

KHuda ke fazl se talim wo hui hai aam

KHirad to KHair junun se bhi hath dho baiThe

bura kiya ki talatum mein na-KHudai ki

kinara bhi na mila naw bhi Dubo baiThe

mariz-e-ishq ka jaldi janaza niklega

kuchh aur der pata puchhte raho baiThe

tamam shahr mein banTi hai dard ki KHairaat

hum us ki din ko dil mein nahin samo baiThe

tumhaari bazm bahut tang aur dasht wasia

chale to aae ghaDi-do-ghaDi hi go baiThe

bujhi na aatish-e-dil hi kisi tarah 'rahil'

wagarna yar to aankhen bahut bhigo baiThe