tum bhi the sar-e-dar sar-e-dar tha main bhi

tum bhī the sar-e-dār sar-e-dār thā maiñ bhī

tum dekh to lete ki numūdār thā maiñ bhī

ye jism rukāvaT thā mere ishq meñ shāyad

aur sach hai ki is jism se bezār thā maiñ bhī

mumkin hai ki betāb rahā ho kabhī tū bhī

yādoñ kī aziyyat meñ giraftār thā maiñ bhī

bāzār meñ laayā gayā yūsuf kī tarah maiñ

kuchh der sahī raunaq-e-bāzār thā maiñ bhī

ḳhud apne ta.āqub meñ nikal aayā thā ghar se

ḳhud apnī adāvat meñ giraftār thā maiñ bhī

chehroñ kī jagah sirf ḳharāsheñ haiñ numāyāñ

bastī meñ kabhī ā.īna-bardār thā maiñ bhī

ai gardish-e-daurāñ ye taġhayyur nahīñ achchhā

tū soch kabhī sāhab-e-dastār thā maiñ bhī

ḳhud bechne niklā thā safī' ḳhud ko jahāñ meñ

aur bhiiḌ meñ ḳhud apnā ḳharīdār thā maiñ bhī

tum bhi the sar-e-dar sar-e-dar tha main bhi

tum dekh to lete ki numudar tha main bhi

ye jism rukawaT tha mere ishq mein shayad

aur sach hai ki is jism se bezar tha main bhi

mumkin hai ki betab raha ho kabhi tu bhi

yaadon ki aziyyat mein giraftar tha main bhi

bazar mein laya gaya yusuf ki tarah main

kuchh der sahi raunaq-e-bazar tha main bhi

KHud apne taaqub mein nikal aaya tha ghar se

KHud apni adawat mein giraftar tha main bhi

chehron ki jagah sirf KHarashen hain numayan

basti mein kabhi aaina-bardar tha main bhi

ai gardish-e-dauran ye taghayyur nahin achchha

tu soch kabhi sahab-e-dastar tha main bhi

KHud bechne nikla tha safi' KHud ko jahan mein

aur bhiD mein KHud apna KHaridar tha main bhi