tum ghairon se hans hans ke mulaqat karo ho

tum ġhairoñ se hañs hañs ke mulāqāt karo ho

aur ham se vahī zahr-bharī baat karo ho

bach bach ke guzar jaao ho tum paas se mere

tum to ba-ḳhudā ġhairoñ ko bhī maat karo ho

nashtar sā utar jaave hai siine meñ hamāre

jab māthe pe bal Daal ke tum baat karo ho

taqve bhī bahak jāveñ haiñ mahfil meñ tumhārī

tum apnī in āñkhoñ se karāmāt karo ho

phūloñ kī mahak aave hai sāñsoñ meñ tumhārī

motī se bikhar jāveñ haiñ jab baat karo ho

ham ġhairoñ ke aage tumheñ kyā haal batā.eñ

paas aa ke suno duur se kyā baat karo ho

kyā kah ke pukāreñge tumheñ log ye socho

'iqbāl' pe tum zulm to din raat karo ho

tum ghairon se hans hans ke mulaqat karo ho

aur hum se wahi zahr-bhari baat karo ho

bach bach ke guzar jao ho tum pas se mere

tum to ba-KHuda ghairon ko bhi mat karo ho

nashtar sa utar jawe hai sine mein hamare

jab mathe pe bal Dal ke tum baat karo ho

taqwe bhi bahak jawen hain mahfil mein tumhaari

tum apni in aankhon se karamat karo ho

phulon ki mahak aawe hai sanson mein tumhaari

moti se bikhar jawen hain jab baat karo ho

hum ghairon ke aage tumhein kya haal bataen

pas aa ke suno dur se kya baat karo ho

kya kah ke pukarenge tumhein log ye socho

'iqbaal' pe tum zulm to din raat karo ho