tum garm mile humse na sarma ke dinon mein

tum garm mile ham se na sarmā ke dinoñ meñ

pesh aa.e ba-garmī bhī to garmā ke dinoñ meñ

jab aa.ī ḳhizāñ ham ko kahā ''bāġh chalo ho''

pūchhā na kabhī sair o tamāshā ke dinoñ meñ

ne ġhurfe se jhāñkā na kabhī baam par aa.e

pinhāñ rahe tum husn-e-dil-ārā ke dinoñ meñ

jī hī meñ rakhī apne miyāñ jī se jo upjī

kuchh ham ne kahā tum se tamannā ke dinoñ meñ

likh likh ke use yāroñ ne dīvān banāyā

kuchh kuchh jo bakā karte the saudā ke dinoñ meñ

dil apnā ulajhtā thā tabhī jin dinoñ pyāre

thī zulf tirī turra-e-lailā ke dinoñ meñ

muflis hue ai 'mus.hafī' afsos ki ham ne

paidā na kiyā yaar ko paidā ke dinoñ meñ

tum garm mile hum se na sarma ke dinon mein

pesh aae ba-garmi bhi to garma ke dinon mein

jab aai KHizan hum ko kaha bagh chalo ho

puchha na kabhi sair o tamasha ke dinon mein

ne ghurfe se jhanka na kabhi baam par aae

pinhan rahe tum husn-e-dil-ara ke dinon mein

ji hi mein rakhi apne miyan ji se jo upji

kuchh hum ne kaha tum se tamanna ke dinon mein

likh likh ke use yaron ne diwan banaya

kuchh kuchh jo baka karte the sauda ke dinon mein

dil apna ulajhta tha tabhi jin dinon pyare

thi zulf teri turra-e-laila ke dinon mein

muflis hue ai 'mushafi' afsos ki hum ne

paida na kiya yar ko paida ke dinon mein