tum hamare nahin to kya gham hai

tum hamāre nahīñ to kyā ġham hai

ham tumhāre to haiñ ye kyā kam hai

baal bikhre haiñ aañkh pur-nam hai

mar gayā kaun kis kā mātam hai

husn kī shoḳhiyāñ zarā dekho

gaah sho.ala hai gaah shabnam hai

muskurā do zarā ḳhudā ke liye

sham-e-mahfil meñ raushnī kam hai

chhā rahī haiñ ghaTā.eñ sāvan kī

zulf-e-gardūñ bhī aaj barham hai

ban gayā hai ye zindagī ab to

tujh se baḌh kar hameñ tirā ġham hai

chaak dāman hai kis liye gul kā

kis liye ashk-rez shabnam hai

mahfil-e-raqs ho ki sher-o-sharāb

tum nahīñ ho to bazm-e-mātam hai

har masarrat alam kā hai partav

jo ḳhushī hai amānat-e-ġham hai

is meñ aañsū bhī haiñ tabassum bhī

zindagī ik tazād-e-paiham hai

shaiḳh sāhab jarāhat-e-dil kā

aap ke paas koī marham hai

is ko sajde kiye farishtoñ ne

aadmī hai ye ibn-e-ādam hai

tum hamare nahin to kya gham hai

hum tumhaare to hain ye kya kam hai

baal bikhre hain aankh pur-nam hai

mar gaya kaun kis ka matam hai

husn ki shoKHiyan zara dekho

gah shoala hai gah shabnam hai

muskura do zara KHuda ke liye

sham-e-mahfil mein raushni kam hai

chha rahi hain ghaTaen sawan ki

zulf-e-gardun bhi aaj barham hai

ban gaya hai ye zindagi ab to

tujh se baDh kar hamein tera gham hai

chaak daman hai kis liye gul ka

kis liye ashk-rez shabnam hai

mahfil-e-raqs ho ki sher-o-sharab

tum nahin ho to bazm-e-matam hai

har masarrat alam ka hai partaw

jo KHushi hai amanat-e-gham hai

is mein aansu bhi hain tabassum bhi

zindagi ek tazad-e-paiham hai

shaiKH sahab jarahat-e-dil ka

aap ke pas koi marham hai

is ko sajde kiye farishton ne

aadmi hai ye ibn-e-adam hai